Press "Enter" to skip to content

Yüzədək qazi sosial-psixoloji və reabilitasiya xidmətləri ilə təmin edilib

Bayraqdar.info – Ölkədəki reabilitasiya mərkəzləri şəbəkəsi Vətən müharibəsində yaralanmış qazilərin bərpa müalicəsi və sosial-psixoloji xidmətlərlə təminatında xüsusi önəm kəsb edir. Prezident İlham Əliyevin tapşırığı əsasında son illər müasir tələblərə uyğun qurularaq istifadəyə verilən belə mərkəzlərdən biri də Naftalan Reabilitasiya Mərkəzidir.

Bu barədə bayraqdar.info-ya avqustun 20-da Əmək və Əhalinin Sosial Müdafiəsi Nazirliyindən məlumat verilib. Bildirilib ki, Nazirliyin tabeliyindəki Dövlət Tibbi Sosial Ekspertiza və Reabilitasiya Agentliyinin Naftalan Reabilitasiya Mərkəzinə mediatur təşkil edilib. Mediatur Vətən müharibəsi qazilərinə göstərilən reabilitasiya və sosial-psixoloji xidmətlərlə media əməkdaşlarının əyani tanışlığı məqsədilə təşkil olunub.

Mediaturda bildirilib ki, 2019-2021-ci illərdə 12 reabilitasiya və sosial xidmət müəssisəsi əsaslı təmir və yenidənqurmadan sonra müasir avadanlıqlarla təchiz edilərək istifadəyə verilib. Postmüharibə dövründə reabilitasiya müəssisələrində müharibədə yaralanmış qazi və yaxınlarının, habelə şəhid ailəsi üzvlərinin sosial-psixoloji və reabilitasiya xidmətləri ilə təminatı həyata keçirilir. Artıq min dörd yüzədək şəxs bu xidmətlərlə əhatə olunub.

Qeyd olunan dövrdə 115 hərbçi 119 yüksək texnologiyalı aşağı ətraf protezi ilə təmin edilib. Həmçinin, bu ilin ötən dövründə 1 min 162 nəfər Birinci və İkinci Qarabağ müharibəsi əlilinə 8 min 639 reabilitasiya vasitəsi verilib. Naftalan Reabilitasiya Mərkəzində də Vətən müharibəsi qazilərinə sınanmış müalicə prosedurları əsasında reabilitasiya xidmətləri göstərilir. Postmüharibə dövründə bu mərkəzdə yüzədək qazi sosial-psixoloji və reabilitasiya xidmətləri ilə təmin edilib. Müasir tibbi-reabilitasiya aparatları, avadanlıqlarla təchiz edilmiş Mərkəzdə effektiv fizioterapevtik üsulların tətbiqi əsasında reabilitasiya xidmətləri göstərilir. Eləcə də Naftalan nefti ilə sınanmış müalicə prosedurları tətbiq edilir.

Mission News Theme by Compete Themes.