Bayraqdar.info – Xəbər verdiyimiz kimi Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyi “Təbiəti qoruyaq” adlı yeni məşğulluq layihəsinə başlayıb. Sentyabrın 15-də layihəyə ilk olaraq Bakı, Sumqayıt, Şəki, Lənkəran şəhərləri, Beyləqan, Quba, Şamaxı, Tərtər və Bərdə rayonlarında yerləşən Şəhidlər Xiyabanlarında təmizlik və abadlıq işlərinin aparılması ilə başlanılıb.
Dövlət Məşğulluq Agentliyindən bayraqdar.info-ya verilən məlumata görə, layihə çərçivəsində növbəti mərhələlərdə aşağıda göstərilən ərazilərdə müvafiq işlər görüləcək: “Layihə çərçivəsində 2 ay müddətində Bakı şəhəri üzrə Novxanı, Türkan, Hövsan, Şıxov, Bilgəh, Buzovna, Mərdəkan, Şüvəlan, Zuqulba, Pirşağı və Sumqayıt çimərliklərdə, 4 ay müddətində isə Göygöl rayonu üzrə Göygöl və Maralgöl Milli Parkı, Lənkəran rayonu üzrə Hirkan Milli Parkı, Salyan rayonu üzrə Şirvan Milli Parkında təmizlik və abadlıq işləri aparılacaq. Habelə layihə çərçivəsində 2 ay müddətində Tərtər, Bərdə, Siyəzən, Xaçmaz, Şəmkir, Tovuz, Yevlax, Zərdab, Ağdaş, Saatlı, Sabirabad, Ağcabədi, Lənkəran, Masallı rayonlarında ağacəkmə kampaniyası təşkil ediləcək”.
Məlumatda o da bildirilib ki, layihənin əsas məqsədi işsiz və işaxtaran şəxslərin məşğulluğunun təmin edilməsi, işçi qüvvəsinin əməyindən səmərəli istifadə edilməsi, ictimai yerlərin abadlaşdırılması, ekoloji təmizliyə, yaşıllıqların artırılmasına töhfə verilməsidir.
