Son yeniləmə: 3 Dekabr 2021 15:54
Bayraqdar.info – Prezident İlham Əliyevin tapşırığı ilə sosial islahatların yeni mərhələsi kimi, növbəti sosial islahat paketi hazırlanıb. Bu paket çərçivəsində 2022-ci ilin əvvəlindən minimum pensiyada artım olacaq. Pensiya ilə yanaşı, müavinətlər də artacaq.
ƏƏSMN-dən bayraqdar.info-ya dekabrın 3-də verilən məlumata görə, bunu əmək və əhalinin sosial müdafiəsi naziri Sahil Babayev deyib.
Qəbələdə Uşaq Reabilitasiya Mərkəzi açılışı tədbiri zamanı KİV-ə müsahibəsində nazir qeyd edib ki, 2018-2021-ci ildə minimum pensiya artımı 82 faiz, orta pensiya artımı 60 faiz olub. Müavinətlərdə də artımlar orta hesabla 2 dəfəyə yaxın olub. Ümumən, yeni ildən növbəti sosial islahat paketi çərçivəsində pensiya, müavinət, təqaüd, əməkhaqqı, sosial yardımlar artacaq.
Bu artımların 2 milyondan çox insanı əhatə edəcəyini deyən S.Babayev bildirib ki, əlavə olaraq 1 milyon 100 mindən çox pensiyaçının pensiyası da gələn ildən indeksasiya nəticəsində artacaq.
Qeyd edib ki, pensiya islahatlarında məqsəd dövlət pensiya sisteminin davamlılığının qorunması ilə yanaşı, bu sistemdə yeni humanist yanaşmaların tətbiqi, pensiya təminatına əlçatanlığın artırılmasıdır. Son illərdə həmin istiqamətdə mühüm addımlar atılıb. Pensiya sistemində yeni humanist yanaşmaların tətbiqi davam edəcək.
