Son yeniləmə: 21 Sentyabr 2022 23:57
Ən çox səs toplamış 46 namizəd arasında tanınmış simalarla yanaşı, yeni adlar da var
BAYRAQDAR MEDİA – Sentyabrın 21-də Azərbaycan jurnalistlərinin VIII qurultayının keçirilməsi üzrə Təşkilat Komitəsinin növbəti iclası keçirilib. Toplantıda üç məsələ müzakirəyə çıxarılıb.
Mətbuat Şurasından verilən məlumata görə, birinci məsələ ilə əlaqədar məlumat verilib ki, müxtəlif media təmsilçiləri qurultayı işıqlandırmaq istəyən jurnalistlərin ali məclisdə iştirakı ilə bağlı suallar ünvanlayırlar: “Onların sərbəst fəaliyyətlərinin təmin edilməsi şərtdir. Bu zaman qurultayın keçirilmə yerinin imkanları nəzərə alınmalıdır. Təşkilat Komitəsi ali məclisi işıqlandıracaq jurnalistlərin ayrıca qeydiyyatının aparılmasını məqbul sayıb. Belə ki, KİV-lər bununla bağlı info@presscouncil.az ünvanına 23 sentyabr 2022-ci il saat 15.00-dək yazılı məlumat göndərməlidirlər. Məlumatda qurultayda jurnalist kimi iştirak edəcək əməkdaşların adları qeyd edilməlidir. Məlumat KİV-in rəsmi blankında olmalı, möhür və imza ilə təsdiqlənməlidir. Telekanallar 3, gündəlik qəzetlər və informasiya agentlikləri 2, digər informasiya resursları isə qurultayı işıqlandıracaq 1 nümayəndə göndərə bilərlər”.
İclasda müzakirəyə çıxarılmış ikinci məsələ MŞ İdarə Heyətinə namizədlərin siyahısı olub: “Təşkilat Komitəsi yekun seçki bülleteninə ən çox səs toplamış 46 namizədin adını daxil edib. Qeyd edək ki, qurultayda MŞ İdarə Heyətinə 28 jurnalist namizəddən 14-ü, 18 ictimaiyyət nümayəndəsi olan namizəddən isə 9-u seçiləcəkdir. İclasda qurultay nümayəndələrinin siyahısı da nəzərdən keçirilib. TK-nın qərarına əsasən siyahı 23 sentyabr 2022-ci il tarixində Mətbuat Şurasının presscouncil.az ünvanında yerləşdiriləcəkdir. Qeyd edək ki, Azərbaycan jurnalistlərinin VIII qurultayı 24 sentyabr 2022-ci il tarixdə Beynəlxalq Muğam Mərkəzində (Ünvan Neftçilər prospekti 30, Dənizkənarı Milli Park) keçiriləcəkdir. Qeydiyyat saat 09.00-dan 10.00-dək aparılacaqdır. Saat 10.00-da qurultay işinə başlayacaqdır”.
Redaksiyanın qeydi: Məlumat üçün bildirək ki, ən çox səs toplayaraq yekun seçki bülleteninə adı daxil edilən 46 namizədin içərisində Mətbuat Şurasının bundan əvvəlki İdarə Heyətinin üzvü olmuş Əflatun Amaşov, Rəşad Məcid (yeri gəlmişkən bu iki şəxs ən çox səs toplayaraq müvafiq olaraq “Jurnalist namizədlər” və “İctimaiyyətdən olan namizədlər” siyahısına rəhbərlik edirlər), Müşfiq Ələsgərli o cümlədən Bayraqdar.info saytının Baş redaktoru Azər Həsrət kimi tanınmışlarla yanaşı, Qalib İbrahimoğlu, Fərid Şahbazlı, Fərid Pərdəşünas, Afiq Mirzəbəyli, Aqil Ələsgər, Aqil Camal və “Orta Asiya və Güney Qafqaz Söz Azadlığı Şəbəkəsi” İctimai Birliyinin (CASCFEN) sədri Nadir İsmayılov kimi yeni adlar da var.
