BAYRAQDAR MEDİA – Samsun Universiteti Tibb Fakültəsi Ürək və Damar Cərrahiyyəsi kafedrasının müəllimləri ilə Samsun Şəhər Xəstəxanası Ürək və Damar Cərrahiyyəsi klinikasının həkimlərindən ibarət komanda yüksək riskli bir aorta əməliyyatını uğurla gerçəkləşdirib.
Bu barədə universitetdən məlumat verilib.
Məlumata görə, Samsunun Ayvacık rayonunda yaşayan 69 yaşlı Ali Akan nəfəs darlığı və halsızlıq şikayətləri ilə xəstəxanaya müraciət edib, müayinələrdə aorta damarında həyati təhlükə yaradan ciddi genişlənmə və ağır dərəcəli qapaq çatışmazlığı aşkarlanıb: “Bundan əlavə, xəstədə nadir rastlanan “dolikoaorta” quruluşu, həmçinin anadangəlmə döş qəfəsi deformasiyası və onurğa əyriliyi səbəbindən ürək və böyük damarların sinə boşluğundakı yerləşməsi normadan fərqli olub. Bu mürəkkəb anatomiya fonunda dr. müəllim üzvü Emrah Ererenin rəhbərlik etdiyi komanda standart cərrahi yanaşmadan kənara çıxaraq xəstəyə özəl əməliyyat planı hazırlayıb. Təxminən 4 saat davam edən əməliyyat zamanı xəstənin təhlükəsiz qan dövranı üçün qasıq damarları üzərindən ürək–ağciyər aparatı qoşulub, ürək 3 saata yaxın dayandırılaraq genişlənmiş və uzanmış aorta seqmenti tamamilə çıxarılıb və yerinə bioloji qapaqlı süni damar yerləşdirilib. Ürək əzələsini qidalandıran damarlardan birinin çətin əlçatan mövqedə olması səbəbi ilə ən mürəkkəb üsullardan sayılan “Cabrol metodu” uğurla tətbiq olunub”.
Əməliyyatdan sonra xəstənin ürək ritminin öz-özünə sabitləşməsi və əlavə dəstək müalicəsinə ehtiyac qalmadan cihazdan ayrılması müdaxilənin yüksək uğur göstəricisi kimi dəyərləndirilib. Ali Akan sağalma dövrünü problemsiz keçirərək evə yazılıb.
İlk şərhi yaza bilərsiniz