BAYRAQDAR MEDİA – Iğdır Universiteti ilə KEYVAN Aviasiya şirkəti arasında qurulan strateji əməkdaşlıq çərçivəsində şəhərdə yaradılması planlaşdırılan Aviasiya Məlumat Mərkəzi üçün ilk rəsmi imzalar atılıb. Qısa müddətdə konkret layihəyə çevrilən bu təşəbbüsün imza mərasimində millət vəkili Cantürk Alagöz, rektor professor doktor Ekrem Gürel və KEYVAN Aviasiyanın rəhbəri Mehmet Keyvan iştirak ediblər.
Bu barədə universitetin məlumatında qeyd edilib.
Məlumata əsasən, bu əməkdaşlıq çərçivəsində Iğdırda aviasiya məlumat mərkəzinin yaradılması ilə yanaşı, məlumat əsaslı texnologiyalar və aviasiya məlumatlarının istehsalı sahəsində geniş fəaliyyətlərin həyata keçirilməsi planlaşdırılır: “Layihə uzunmüddətli perspektivdə yüksək texnologiya və yüksək əlavə dəyər yaradan istehsal sahələrinin inkişafına töhfə verəcək. Eyni zamanda bu təşəbbüsün Iğdırın texnologiya yatırımları sahəsində mövqeyini gücləndirəcəyi və Türkiyə üzrə məlumat əsaslı inkişaf layihələrinə nümunə olacağı gözlənilir. Layihə çərçivəsində xüsusilə proqramlaşdırma və aviasiya sahəsində təhsil alan gənclərin işlə təmin olunması və yerli kadr potensialının qiymətləndirilməsi hədəflənir”.
Planlara əsasən, yaradılacaq mərkəz vasitəsilə Avropa Aviasiya Təhlükəsizliyi Agentliyinin nəzarət proseslərinin də bu infrastruktur üzərindən həyata keçirilməsi mümkün olacaq. Türkiyənin ikinci aviasiya məlumat mərkəzinin Iğdırda qurulması ölkənin bu sahədə yerli və dayanıqlı potensialını artıracaq.
