BAYRAQDAR MEDİA – Eskişehirin Odunpazarı rayonunda yerləşən Kurşunlu Məscidi və Külliyəsində fəaliyyət göstərən lülə daşı sərgisi və hədiyyəlik əşyaların satış bölmələri yerli və xarici turistlərin böyük marağına səbəb olur.
Bu barədə sakaryagazetesi.com.tr saytı məlumat yayıb.
Məlumatda deyilir ki, Eskişehirin ən əhəmiyyətli turizm mərkəzlərindən biri hesab edilən tarixi Odunpazarı Evləri bölgəsində yerləşən Kurşunlu Məscidi və Külliyəsi zəngin mədəni irsi ilə ziyarətçiləri qəbul etməyə davam edir. Külliyənin tərkibində fəaliyyət göstərən lülə daşı sərgi sahəsi və hədiyyəlik əşyaların satış məntəqələri şəhərə gələn yerli və xarici turistlərin ən çox üz tutduğu məkanlardan birinə çevrilib. Tur qrupları və fərdi ziyarətçilər Eskişehirə məxsus ən məşhur əl sənəti nümunələrindən olan lülə daşından hazırlanan əsərlərlə yaxından tanış olmaq imkanı əldə edirlər.
Kurşunlu Məscidi və Külliyəsində nümayiş etdirilən lülə daşı məmulatları ziyarətçilərin böyük rəğbətini qazanır. Eskişehirlə eyniləşdirilən lülə daşından hazırlanan qəlyan boruları, təsbehlər, zinət əşyaları və müxtəlif bəzək məmulatlarına baxan turistlər məhsulların hazırlanma prosesi barədə sənətkarlar və məsul şəxslərdən ətraflı məlumat alırlar. Əl əməyinin məhsulu olan hədiyyəlik əşyalar həm şəhərin mədəni dəyərlərini əks etdirməsi, həm də özünəməxsus dizaynı ilə ziyarətçilərin diqqətini cəlb edir.
İlk şərhi yaza bilərsiniz