BAYRAQDAR MEDİA – Manisa Celal Bayar Universitetinin (MCBÜ) iki layihəsi Avropa Həmrəylik Proqramının (ESC30) dəstəyi ilə qrant almaq hüququ qazanıb. Layihələr 532 təklifin qiymətləndirildiyi proqramda seçilən 39 layihə arasında yer alıb.
Bu barədə universitetin məlumatında qeyd edilib.
Bildirilib ki, “Yanğın Xəbərdarlıq Sistemi” və “Virtual Reallıqla Aigai İrsinin Canlandırılması” layihələri müxtəlif ixtisaslardan tələbələrin iştirakı ilə hazırlanıb. Yanğın Xəbərdarlıq Sistemi Manisa və ətrafındakı meşəlik və yaşayış ərazilərində gənclərin rəhbərliyi ilə aşağı xərcli rəqəmsal erkən xəbərdarlıq sisteminin yaradılmasını nəzərdə tutur. Layihə gənclərin rəqəmsal bacarıqlarının inkişaf etdirilməsinə və yerli icmalarda fəal iştirakının artırılmasına xidmət edəcək.
Virtual reallıq layihəsində isə Manisadakı Aigai qədim şəhərinin üçölçülü modellərinin hazırlanması və VR texnologiyası vasitəsilə rəqəmsal təcrübənin yaradılması planlaşdırılır. Hər iki layihənin gənclərin texnologiya, ətraf mühit və mədəni irs sahələrində fəal rol oynamasına töhfə verməsi məqsədi daşıyır.
İlk şərhi yaza bilərsiniz