BAYRAQDAR MEDİA – Konya Səlcuq Universitetinin ev sahibliyi ilə keçirilən VI Beynəlxalq Peyvənd Elmi Konqresində peyvəndlərin hazırlanması, yerli istehsal, pandemiya təcrübəsi və “Vahid sağlamlıq” yanaşmasının əhəmiyyəti müzakirə olunub. Konqresdə dəvətli məruzəçi kimi iştirak edən Atatürk Universitetinin rektoru professor Ahmet Hacımüftüoğlu peyvəndlərin ictimai sağlamlığın qorunmasındakı roluna diqqət çəkib.
Bu barədə universitetin məlumatında qeyd edilib.
Bildirilib ki, tədbirdə çıxış edən alimlər COVID-19 pandemiyasının yerli peyvənd istehsalının və texnoloji müstəqilliyin əhəmiyyətini göstərdiyini bildiriblər. Konqresin yerli təşkilat komitəsinin sədri professor Osman Erganiş peyvəndləmənin yoluxucu xəstəliklərlə mübarizədə ən səmərəli üsullardan biri olduğunu deyib və TURKOVAC peyvəndinin hazırlanmasının əhəmiyyətini vurğulayıb.
Professor Hacımüftüoğlu peyvəndlər sayəsində təxminən 70 milyon insanın həyatının xilas edildiyini bildirib. O, xaricdən xammal tədarükünün dayandırılması halında Türkiyənin dərman istehsalı imkanlarının 28–29 günlə məhdudlaşa biləcəyini qeyd edərək səhiyyədə xarici asılılığın azaldılmasının vacibliyini vurğulayıb.
Peyvənd Elmi Dərnəyinin sədri professor Adnan Yüksel Gürüz peyvənd əleyhinə fikirlərin ictimai sağlamlıq üçün ciddi problem olduğunu bildirib. Türkiyə Peyvənd İnstitutunun rəhbəri professor Ateş Kara isə sosial şəbəkələrdə elmi həqiqətləri inkar edən fikirlərin peyvəndlərə qarşı tərəddüdü artırdığını söyləyib. Səlcuq Universitetinin rektoru professor Hüseyin Yılmaz “Vahid sağlamlıq” yanaşmasının insan, heyvan və ətraf mühit sağlamlığının qarşılıqlı əlaqəsini nəzərə aldığını vurğulayıb.
İlk şərhi yaza bilərsiniz