BAYRAQDAR MEDİA – Almaniyada, işgüzar tədbirlər sənayesinin mühüm sərgilərindən hesab olunan “IMEX Frankfurt” sərgisi keçirilir. Sərgidə Azərbaycan Turizm Bürosunun təşkilatçılığı ilə ölkəmizin işgüzar turizm imkanları da təbliğ edilir.
Bu barədə BAYRAQDAR MEDİA-ya mayın 24-də Dövlət Turizm Agentliyindən məlumat verilib.
Bildirilib ki, sərgidə milli stenddə işgüzar turizm imkanlarını tanıtmaq və bu məqsədlə Azərbaycana səfər edəcək sənaye nümayəndələrinin sayını artırmaq üçün Azərbaycan Turizm Bürosu ilə yanaşı, Heydər Əliyev Mərkəzi, Bakı Konqres Mərkəzi də daxil olmaqla ümumilikdə 10 yerli tərəfdaş təmsil olunur: “Stenddə keçirilən görüşlərdə digər ölkələri təmsil edən nümayəndələrə Azərbaycanda müasir və geniş çeşidli xidmətlər təklif edən işgüzar turizm infrastrukturu, Heydər Əliyev Mərkəzi, Bakı Konqres Mərkəzi, Bakı Ekspo Mərkəzi kimi beynəlxalq səviyyəli tədbirlərin keçirildiyi məkanlar, eləcə də hotellər və irimiqyaslı biznes tədbirlərinə ev sahibliyi etmə potensialı haqqında məlumat verilir. Mayın 25-dək davam edəcək “IMEX Frankfurt” sərgisinə 150-dən çox ölkədən 2 min 500 turizm nümayəndəsi qatılıb”.
Məlumat üçün bildirək ki, 2023-cü ildə Azərbaycan 74-cü Beynəlxalq Astronavtika Konqresi, Avropa Gənclər Parlamentinin 99-cu Beynəlxalq Sessiyası, Avropa Cranio Maksillo Üz Cərrahiyyəsi Assosiasiyasının Regional Konqresinə, həmçinin 2024-cü ildə “University Scholars Leadership” simpoziumuna ev sahibliyi etməyə hazırlaşır.
