BAYRAQDAR MEDİA – Mədəniyyət naziri Adil Kərimlinin rəhbərlik etdiyi nümayəndə heyəti iyunun 23-də Xorvatiyanın paytaxtı Zaqreb şəhərinə səfər edib.
Bu haqda xəbər BAYRAQDAR MEDİA-ya Mədəniyyət Nazirliyinin mətbuat xidmətindən daxil olub.
Xəbərdə bildirilir ki, “səfərin məqsədi Azərbaycan və Xorvatiya arasında iqtisadi əməkdaşlıq üzrə birgə Hökumətlərarası Komissiyanın 2024-cü ilin 13 mart tarixində Bakıda keçirilmiş 3-cü iclasında əldə olunmuş razılaşmaların icrasının fəallaşdırılması və iki ölkənin müvafiq biznes strukturları arasında əlaqələrin daha da inkişaf etdirilməsidir. Səfər, eyni zamanda, Azərbaycan ilə Xorvatiya arasında mədəni əlaqələrin inkişafı, təcrübə mübadiləsi, o cümlədən Azərbaycanda mədəni və yaradıcı sənayelər (MYS) sahəsində fəaliyyət göstərən biznes subyektlərinin məhsul və xidmətlərinin bu ölkəyə ixrac potensialının dəyərləndirilməsi, yeni əməkdaşlıq münasibətlərinin qurulması məqsədi daşıyır”.
Daha sonra xəbərdə deyilir ki, “nümayəndə heyətində Azərbaycanın MYS-lər üzrə biznes subyektləri də geniş təmsil olunur. Səfər zamanı A.Kərimli ilə Xorvatiyanın mədəniyyət və media naziri xanım Nina Obuljen Koržinek arasında ikitərəfli görüş keçiriləcək. Eyni zamanda, iki ölkənin biznes strukturları, o cümlədən MYS üzrə ixtisaslaşmış biznes nümayəndələrinin görüşünün təşkil edilməsi, ortaq layihələrin müzakirəsi nəzərdə tutulur”.
Bildirək ki, Azərbaycan nümayəndə heyətinin Xorvatiyanın “Kultura Nova” Fondunun rəhbərliyi ilə də görüşü olacaq.
Səfər müddətində Xorvatiyanın Milli və Universitet Kitabxanasının fəaliyyəti ilə tanışlıq olacaq.
Həmçinin Azərbaycan nümayəndə heyəti Xorvatiya Audiovizual Mərkəzində ölkənin kino və media sahəsindəki inkişaf modeli ilə tanış olaraq potensial əməkdaşlıq imkanlarını da araşdıracaq. Səfər çərçivəsində Azərbaycanın tanınmış musiqiçilərinin iştirakı ilə mədəni proqram da planlaşdırılır.
