İki qardaş ölkənin rəhbəri Bişkekdə görüşür
BAYRAQDAR MEDİA – Qazaxıstan Prezidenti Qasım-Jomart Toqayev, Qırğızıstan Prezidenti Sadır Caparovun dəvəti ilə avqustun 22-də Bişkekə rəsmi səfər edəcək.
Bu barədə Veçernıy Bişkek məlumat yayıb.
Məlumata görə, səfər çərçivəsində iki lider Qazaxıstanla Qırğızıstan arasındakı ikitərəfli münasibətlərin mövcud vəziyyətini müzakirə edəcək və strateji tərəfdaşlığın daha da gücləndirilməsi istiqamətində addımları nəzərdən keçirəcəklər: “Qırğızıstan Prezident Administrasiyasının Xarici Siyasət İdarəsinin rəhbəri Sagınbek Abdumutalipin açıqlamasına görə, Qasım-Jomart Toqayevin səfəri zamanı ikitərəfli dar görüşlərlə yanaşı, Ali Dövlətlərarası Şuranın yeddinci iclası da keçiriləcək. Tərəflər iqtisadiyyat, enerji, nəqliyyat, mədəniyyət və təhsil sahələrində əməkdaşlığın dərinləşdirilməsinə dair aktual məsələləri müzakirə edəcəklər”.
Məlumatda deyilir ki, səfər çərçivəsində, həmçinin Bişkekdəki “Intımak” parkında “Dostluğun Qızıl Körpüsü” abidəsinin açılışı olacaq: “Eyni tarixdə Oş şəhərində Qazaxıstan Respublikasının Baş Konsulluğunun rəsmi açılışı olacaq. Qırğızıstanda “Qazax Kinosu Günləri” və Bişkekdə üçüncü Qırğız-Qazax Gənclər Forumu kimi mədəni tədbirlər də səfər proqramına daxildir. Qasım-Jomart Toqayevin səfəri iki ölkə arasında diplomatik və iqtisadi münasibətlərin sürət qazandığı bir dövrdə reallaşır. Tərəflərin regional sabitlik, sərhəd təhlükəsizliyi və Türküstan coğrafiyasında çoxtərəfli əməkdaşlıq mövzularında ortaq baxış formalaşdıracağı gözlənilir”.
