BAYRAQDAR MEDİA – Denizlinin Çameli rayonunun brendləşmə hədəfləri çərçivəsində Elmalı məhəlləsinin “Ən Yaxşı Turizm Kəndi” (Best Tourism Village) şəbəkəsinə daxil edilməsi və rayonda “Yerüzü bazarı”nın yaradılması istiqamətində işlər sürətləndirilib.
Bu barədə Pamukkale Universitetindən məlumat verilib.
Məlumata görə, “Sakit şəhər” statusuna malik olan Çameli turizm sahəsində qarşılaşdığı problemlərə uzunmüddətli və davamlı həll yolları tapmaq, rayonun mövcud potensialını milli və beynəlxalq miqyasda gücləndirmək məqsədilə mühüm addım atıb: “Çameli Kaymakamlığı, Çameli Bələdiyyəsi və turizm üzrə tərəfdaşların iştirakı ilə keçirilən “Sakit Şəhər Çameli Turizm Yol Xəritəsi Çalıştayı”nın yekun hesabatına əsasən hazırlanmış fəaliyyət planlarının icrasına başlanılıb”.
PAÜ Turizm Fakültəsinin dekanı, Prof.Dr. Serkan Bertanın moderatorluğu ilə təşkil olunan çalıştayda turizmin bütün sahələrini əhatə edən beş ayrı işçi qrup formalaşdırılıb. Çalıştaydan sonra turizmi dəstəkləyən beynəlxalq təşəbbüslərin sürətləndiyini bildirən Serkan Bertan Elmalı kəndinin “Best Tourism Village” şəbəkəsinə qoşulması üçün rəsmi prosedurun başlandığını açıqlayıb. O, bu təşəbbüsün Çamelinin tanınırlığını artıracağını, kəndin mədəni irsinin, təbii mühitinin və yerli istehsal potensialının qlobal miqyasda görünür olacağını qeyd edib.
Professor həmçinin dayanıqlı kənd təsərrüfatını və yerli istehsalçıları dəstəkləyən “Yerüzü bazarı” modelinin Çamelidə tətbiqi üçün işlərə başlanıldığını bildirib. O, dünyada 110, Türkiyədə isə hazırda yalnız Foça, Tarsus, Şile, Kapadokya–Uçhisar, Adana, Kastamonu və Muğlada fəaliyyət göstərən bu bazarların səkkizincisinin Çamelidə qurulmasının planlaşdırıldığını vurğulayıb. Qeyd edilib ki, “Yerüzü bazarı”nda istehsalçılar öz məhsullarını ədalətli qiymətlə, təzə, mövsümündə və dayanıqlı kənd təsərrüfatı prinsiplərinə uyğun şəkildə birbaşa istehlakçılara təqdim edəcəklər.
