BAYRAQDAR MEDİA – Son günlər Azərbaycan Respublikasında əsas gündəm Güney Azərbaycan məsələsidir. İranın Güney Azərbaycana qarşı düşmən mövqeyi və bu istiqamətdə apardığı fəaliyyətlər artıq dözülməz həddə çatmışdır. Bu fəaliyyətlər təkcə Azərbaycan üçün deyil, eyni zamanda Türkiyə üçün də ciddi təhdid səviyyəsinə yüksəlmişdir.
Bir müddət əvvəl bir slayd hazırlamaq üçün 1945-ci ildə Seyid Cəfər Pişəvəri tərəfindən Güney Azərbaycanda qurulan Azərbaycan Milli Hökumətinin xəritəsini axtarırdım. Ancaq qarşıma çıxan xəritə həqiqət deyil, millətimizə qarşı qurulan bir tələ idi.
Həmin dövrdə İranda Sovetlərin dəstəyi ilə başqa bir qurum da meydana çıxmışdı — Kürd Mahabad Hökuməti. Mahabad Hökumətinin sərhədləri yalnız Mahabad (Soyuqbulaq) şəhəri və onun ətrafı ilə məhdud idi. Bu isə ərazi baxımından olduqca kiçik bir sahəni əhatə edirdi. Bu məlumatların mənbələri və ölçüləri bu gün də məlumdur. Hətta həmin dövrü görmüş bəzi şahidlər hələ də sağdır. Lakin hazırda ortada açıq-aşkar bir Acəm oyunu oynanılır.
Belə ki, internet üzərindən Mahabad Hökumətinin nəzarət etdiyi əraziləri araşdırdıqda, bu sərhədlərin təkcə Mahabadla məhdudlaşmadığı, demək olar ki, Təbriz torpaqlarına qədər uzadıldığı görünür. Daha təhlükəlisi isə Qərb mənbələrinin bu sərhədləri Quzeyə doğru genişləndirərək Güney Azərbaycan torpaqları ilə Türkiyə sərhədini əhatə edəcək şəkildə göstərməsidir. Son bir-iki ildə isə terror təşkilatına yaxın mənbələr bu ərazini demək olar ki, İranın yarısını əhatə edəcək formada təqdim etməyə başlamışdır. Mahabad Hökumətinə aid ərazi ölçüləri də mənbədən mənbəyə dəyişir. Bəzi mənbələr bu sahəni 24 min kvadrat kilometr göstərdiyi halda, digərləri 33 min, hətta 44 min kvadrat kilometr kimi təqdim edir.
Bu xəritə dəyişiklikləri sadəcə emosional bir təsəlli deyil; bunun arxasında son dərəcə təhlükəli və planlı bir niyyət dayanır. Məqsəd Türkiyə ilə Güney Azərbaycan arasında terror dəhlizi formalaşdırmaqdır. Üstəlik, bu plan yalnız xəritələr üzərində qalmır, faktiki addımlarla da həyata keçirilir və bu proses birbaşa İran dövləti tərəfindən dəstəklənir. İran bölgədə gücünü qıra bilmədiyi Azərbaycan Türklüyünü zəiflətmək üçün PKK-nın İran qolu olan PEJAK-dan istifadə edir.
Son illərdə İran bölgəyə kütləvi şəkildə terrorçu axını təşkil etmiş, zahirən qarşı olduğunu iddia etdiyi PEJAK-a Azərbaycan vilayətlərində gizli dəstək vermişdir. Bölgəyə yerləşdirilən şəxslər sıravi insanlar deyil, birbaşa PEJAK üzvləri və ya onun tərəfdarlarıdır. Hətta həbsdən azad olunan PEJAK üzvləri belə həmin ərazilərə köçürülərək orada məskunlaşdırılır. Bu plan çərçivəsində İran həm gücünü qıra bilmədiyi Azərbaycan türklərini zəiflətməyi, həm də PEJAK silahlılarını nəzarət altında saxlamağı hədəfləyir. Yəni bir daşla iki quş vurmaq istəyir.
Bu siyasətin nəticələrini bu gün də açıq şəkildə görmək mümkündür. Xüsusilə son illərdə İran işğalında olan Qərbi Azərbaycan vilayətində (Türkiyə sərhədi boyunca) PEJAK-ın silahlı fəaliyyəti kəskin şəkildə artmışdır. Bölgənin türk əhalisinə qarşı təzyiqlər gücləndirilmiş, məcburi köç siyasəti tətbiq olunmaqdadır. Türkiyə sərhədində yerləşən Türk kəndləri PEJAK hücumlarına məruz qalır. Son on ildə boşaldılan kəndlərin sayı yüzlərlə ifadə olunur. Bu hücumlara dair görüntülər internetdə də mövcuddur. Lakin bütün bunlara baxmayaraq, İranın təhlükəsizlik və hüquq-mühafizə orqanları heç bir müdaxilə etmir.
Aydın şəkildə görünür ki, bölgədə bizə qarşı planlı bir oyun oynanılır. Bizə düşən isə bu oyunun qarşısını vaxtında almaqdır. Həmişə dediyim kimi, tarix bu torpaqlardan bizi silmək istəyənlərin məzarları ilə doludur. Günün sonunda, bizə oyun quranları da babalarının yanına göndərməyi yaxşı bilirik.
