BAYRAQDAR MEDİA– Türkiyədə Pamukkale Universitetinin Tibb Fakültəsində 14 Mart Tibb Bayramı münasibətilə keçirilən mərasimdə tələbələr ağ xalat geyinərək həkimlik peşəsinə ilk addımlarını atıblar. Prof. Dr. Hüseyin Yılmaz Konqres və Mədəniyyət Mərkəzində keçirilən tədbirdə ümumilikdə 273 tələbəyə ağ xalat təqdim olunub.
Bu barədə universitetin məlumatında qeyd edilib.
Məlumata görə, mərasimdə universitet rəhbərliyi, akademik heyət, Denizli Həkimlər Palatasının nümayəndələri, tələbələr və onların ailə üzvləri iştirak ediblər. Çıxış edən natiqlər ağ xalatın yalnız bir geyim deyil, həm də elmə, məsuliyyətə və dürüstlüyə bağlılığın simvolu olduğunu vurğulayıblar.
Tədbirdə həmçinin qeyd olunub ki, həkimlik yalnız peşə deyil, eyni zamanda həyat tərzidir və gələcək həkimlər biliklə yanaşı vicdan və mərhəmət prinsiplərini də rəhbər tutmalıdırlar. Sonda birinci kurs tələbələri protokol üzvləri tərəfindən ağ xalatlarını geyinərək həkimlik yoluna rəsmi şəkildə qədəm qoyublar.
İlk şərhi yaza bilərsiniz