89-cu Ümumdünya Kitabxana Konqresi ilk dəfə Astanada
BAYRAQDAR MEDİA – “2025-ci il avqustun 18-dən 22-dək Astana dünyanın kitabxana paytaxtına çevriləcək və Beynəlxalq Kitabxana Assosiasiyaları və Qurumları Federasiyasının (IFLA) təşkil etdiyi 89-cu Ümumdünya Kitabxana və İnformasiya Konqresinə ev sahibliyi edəcək. Bu, kitabxana və informasiya texnologiyaları sahəsində ən böyük qlobal tədbirdir. Forumun “Bilikləri birləşdirərək gələcək qururuq” şüarı altında keçəcək”.
Bu barədə BAYRAQDAR MEDİA-ya Qazaxıstanın Azərbaycandakı səfirliyindən məlumat verilib.
Məlumata görə, Beynəlxalq Kitabxana Assosiasiyaları və Qurumları Federasiyası (IFLA), Qazaxıstan Respublikasının Ali Təhsil Müəssisələri Kitabxanaları Assosiasiyası, “KazakhTourism” Milli Şirkəti, Astana şəhər Akimatı nəzdində “Astana İnkişaf Mərkəzi” ASC-nin təşkilatçısı olduğu tədbirdə iştirak üçün Astanaya 114 ölkədən 1 630-dan çox iştirakçı gələcək: “Onların arasında kitabxana rəhbərləri, informasiya mərkəzlərinin mütəxəssisləri, müəllimlər, tələbələr və aparıcı nəşriyyatların nümayəndələri olacaq. Məqsəd qabaqcıl təcrübə mübadiləsi aparmaq və kitabxana işində əsas tendensiyaları müzakirə etməkdir. Ən çox iştirakçı ilə təmsil olunan ölkələr arasında Qazaxıstan, ABŞ, Çin, Cənubi Koreya, Almaniya, Yaponiya və digərləri var”.
Qeyd edilib ki, IFLA-nın təxminən yüzillik tarixində konqres cəmi iki dəfə keçmiş SSRİ ərazisində, ümumilikdə isə Asiyada cəmi doqquz dəfə keçirilib: “2025-ci ildə Astana Mərkəzi Asiyada bu nüfuzlu qlobal tədbirə ev sahibliyi edən ilk şəhər olacaq və dünya kitabxana ictimaiyyətinin peşəkarlarını birləşdirən məkan kimi tarixə düşəcək. Konqres proqramına 80-dən çox peşəkar sessiya, o cümlədən: Rəqəmsal kitabxanalar və süni intellekt üzrə təlimatlar; Kitabxana fondlarının qorunması metodları; UNIMARC da daxil olmaqla kataloqlaşdırma standartları daxildir. Əsas tədbirlər sırasında – Qazaxıstan Prezidenti Qasım-Jomart Toqayevin açılış mərasimindəki salamla nitqi, MEGA Silk Way Ticarət Mərkəzində qlobal kitab fləşmobu, ICESCO nümayəndəsi Dr. Qays Hammaminin kitabxanaların mədəniyyət yönümlü gələcəyin formalaşmasındakı rolu barədə məruzəsi, həmçinin Astanadakı ictimai, universitet və məktəb kitabxanalarına ekskursiyalar olacaq”.
Ətraflı proqram rəsmi saytda mövcuddur:
KİV üçün əlaqə: e-poçt: wlic-registration@kit-group.org
