Son yeniləmə: 9 Sentyabr 2025
BAYRAQDAR MEDİA – “FIFA Arena” layihəsi çərçivəsində 247 nömrəli tam məktəbdə inşa edilən futbol meydançasının açılış mərasimi keçirilib.
Bu haqda xəbər BAYRAQDAR MEDİA-ya Azərbaycan Futbol Federasiyaları Assosiasiyasından (AFFA) daxil olub.
Xəbərdə qeyd edilir ki, “tədbirdə AFFA prezidenti Rövşən Nəcəf, elm və təhsil naziri Emin Əmrullayev, Ukrayna Futbol Assosiasiyasının prezidenti Andriy Şevçenko, AFFA-nın, FIFA-nın, Elm və Təhsil Nazirliyinin rəsmiləri, futbol ictimaiyyətinin nümayəndələri və məktəblilər iştirak ediblər. R.Nəcəf, E.Əmrullayev və A.Şevçenko çıxış edərək layihənin önəmindən bəhs ediblər. Həmçinin FIFA prezidenti Canni İnfantino videomüraciətlə layihənin uğurla həyata keçirilməsi ilə əlaqədar təbrikini çatdırıb”.
Qeyd edək ki, AFFA dünyada “FIFA Arena” layihəsini tamamlayan ilk 11 ölkə arasında yer alır. Milli assosiasiya 2 məktəbdə iki meydança inşa edib və bu layihədən birbaşa 6 mindən çox şagird faydalanacaq. FIFA prezidentinin video müraciətində qeyd olunduğu kimi, AFFA uşaqların təhsili və futbolu təşviq etmək üçün təhlükəsiz məkanlara çıxışını təmin edəcək mühüm bir layihəni tamamlayıb.
Azərbaycan futbola böyük həvəsi olan ölkədir. Uşaqların oynamaq və inkişaf etmək üçün imkanlara ehtiyacları var. Bir sözlə, belə layihələr təkcə meydançaların tikilməsinə deyil, bütün oğlan və qızlar üçün fürsət yaratmağa xidmət edir.
