BAYRAQDAR MEDİA – Energetika naziri Pərviz Şahbazov Zimbabve Milli Assambleyasının sədri Yakob Fransis Nzvidamilimo Mudendanın başçılıq etdiyi nümayəndə heyəti ilə görüşüb.
Bu haqda xəbər BAYRAQDAR MEDİA-ya Energetika Nazirliyinin mətbuat xidmətindən daxil olub.
Xəbərdə qeyd olunur ki, “görüşdə Azərbaycanla Zimbabve arasında enerji sahəsində əməkdaşlığın inkişaf perspektivləri, bərpa olunan enerji, neft-qaz sənayesi və enerji qanunvericiliyi üzrə təcrübə mübadiləsi məsələləri müzakirə edilib. Azərbaycanın enerji sektorunun inkişaf yolu, ölkənin qlobal enerji təhlükəsizliyinə töhfəsi və enerji keçidi istiqamətində həyata keçirilən tədbirlər barədə məlumat verilib. Bildirilib ki, karbohidrogenlər uzun illər qlobal enerji balansının mühüm tərkib hissəsi olaraq qalacaq, eyni zamanda, Azərbaycan bərpa olunan enerji mənbələrinin inkişafını strateji prioritet kimi müəyyənləşdirib. Bərpa olunan enerji mənbələri sahəsində beynəlxalq təcrübəyə uyğun müasir qanunvericilik bazasının formalaşdırıldığı və onun artıq praktikada öz səmərəliliyini təsdiq etdiyi qeyd olunub. Həmçinin həyata keçirilən külək-günəş enerjisi layihələri, “yaşıl enerji dəhlizi” təşəbbüsləri ilə bağlı məlumatlar diqqətə çatdırılıb”.
Ardınca xəbərdə, “Zimbabve Milli Assambleyasının sədri Azərbaycanın enerji sektorunun inkişaf təcrübəsinə maraq göstərdiklərini bildirib. O, ölkəsində enerji təhlükəsizliyinin gücləndirilməsi, investisiya mühitinin təkmilləşdirilməsi, bərpa olunan enerji layihələrinin inkişafı, eləcə də enerji qanunvericiliyi və maliyyələşdirmə mexanizmləri sahəsində Azərbaycanın təcrübəsinin öyrənilməsinin əhəmiyyətini vurğulayıb. Görüşdə Azərbaycanın neft-qaz müqavilələri modeli, bərpa olunan enerji sahəsində qanunvericilik bazası və investisiya mexanizmləri üzrə təcrübəsinin Zimbabve tərəfi ilə bölüşülməsi məqsədilə müvafiq seminarın keçirilməsi razılaşdırılıb” deyə bildirilir.
İlk şərhi yaza bilərsiniz