Son yeniləmə: 15 Aprel 2024 16:44
“Naxçıvan fotolarda” sərgisində nümayiş olunan fotolar insanda ilk baxışdan məhz bu təəssüratı yaradır
BAYRAQDAR MEDİA – Aprelin 15-də Bakıda, Beynəlxalq Muğam Mərkəzində “Naxçıvan fotolarda” adlı fotosərginin keçiriləcəyi haqqında məlumat vermişdik.
Naxçıvan Muxtar Respublikasının 100 illik yubileyi ilə əlaqədar Azərbaycan Respublikası Mədəniyyət Nazirliyi, Beynəlxalq Muğam Mərkəzi və “Şərq qapısı” qəzetinin təşkilatçılığı, Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəliyinin dəstəyi ilə keçirilən mərasim haqqında bir qədər sonra ətraflı məlumat verəcəyik.
Bu gün Naxçıvan öz inkişafının yeni mərhələsinə qədəm qoyub
Hələlik isə onu qeyd edək ki, Azərbaycanın tarixi yurd yerlərindən, qədim mədəniyyət və yaşayış məskənlərindən olan Naxçıvan hazırda özünün yeni inkişaf dövrünü yaşayır. Bunu Naxçıvana səfər edən hər kəs deyir.
Hazırda bu qədim diyarda yeni canlanma, tikinti-quruculuq işləri gedir. Bütün bunlar isə məhz Prezident İlham Əliyevin diqqət və qayğısının bəhrəsidir. Dövlət başçısının 5 iyun 2023-cü il tarixli “Naxçıvan Muxtar Respublikasının sosial-iqtisadi inkişafına dair 2023-2027-ci illər üçün Dövlət Proqramı”nın təsdiq edilməsi haqqında Sərəncamı da deyilənlərin əyani sübutudur.
Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəliyinin təsis edilməsi, bu nümayəndəliyin öz işini səmərəli qurması isə bu il yaranmasının 100-cü ildönümünü qeyd edən Naxçıvan Muxtar Respublikasında inkişafı daha da sürətləndirib.
Sərgilənən fotolar xüsusi dəqiqliklə və zövqlə seçilib
Beləliklə, bu təəssüratlar altında Bakıda “Naxçıvan fotolarda” adlı fotosərginin açılışı oldu. Bu məqamda da bir haşiyə çıxmaq istərdik.
Beynəlxalq Muğam Mərkəzində keçirilən fotosərgidə təqdim olunana fotolar o qədər dəqiqliklə və xüsusi zövqlə seçilmişdi ki, bu sərgiyə gələnlər sanki Naxçıvana “bir göz qırpımında” səyahət etmiş olurdular. Hər halda həmin fotolar insanda ilk baxışdan məhz bu təəssüratı yaradır.
Rəngarəng xatirələrə cığır salan fotolar
Elə Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsi Fuad Nəcəfli, mədəniyyət naziri Adil Kərimli, ölkənin ictimaiyyət və media nümayəndələrinin iştirak etdiyi sərginin açılış mərasimi də maraqlı məqamlarla yadda qaldı. Məsələn, Mətbuat Şurasının sədri Rəşad Məcid sərgilənən fotolardan bəzilərinin qarşısında dayanaraq, ətrafdakılara “bax bura Batabatdır, gözəl yerdir”, “Bu güllü-çiçəkli yaylaqlar da məni bir anlıq yenidən Naxçıvana apardı” və s. bu kimi xatirələrlə zəngin fikirləri dilə gətirirdi.
Azərbaycan Milli Elmlər Akademiyasının prezidenti, Milli Məclisin deputatı İsa Həbibbəyli isə Rəşad Məcidə və digər iştirakçılara tanış olmayan fotoların çəkildiyi məkanlar barədə geniş bilgi verirdi. Onun mədəniyyət nazir Adil Kərimliyə bir fotonu göstərərək, “baxın, o dağın digər tərəfində bizim kəndimiz yerləşir” deməsi isə hamımızın diqqətini həmin fotoya yönəltdi.
Yubiley tədbirləri Naxçıvanla yanaşı, başqa şəhərlərdə və xarici ölkələrdə də geniş şəkildə qeyd olunur
Beləliklə, bu xoş təəssüratlarla keçid aldıq rəsmi açılış mrasiminə. Sərgi barədə qısa təqdimat edən mərasimin aparıcısı, tanınmış media təmsilçisi Lalə Azərtaş “Son dövrlər Naxçıvana tez-tez yolumuz düşür. Amma bu sərgidən sonra yenidən Naxçıvana getmək həvəsim yarandı” deyərək, sözü Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsi Fuad Nəcəfliyə verdi.
Səlahiyyətli nümayəndə öncə Prezident İlham Əliyevin 2023-cü il dekabrın 30-da “Naxçıvan Muxtar Respublikasının 100 illik yubileyinin keçirilməsi haqqında” imzaladığı Sərəncama əsasən əlamətdar tədbirlərin keçirildiyini diqqətə çatdırdı: “Yubiley tədbirləri Naxçıvan şəhəri ilə yanaşı, başqa şəhərlərdə, xarici ölkələrdə də geniş şəkildə qeyd olunur”.
F.Nəcəflinin sözlərinə görə, “Naxçıvan fotolarda” sərgisi mart ayında Türkiyə Cümhuriyyətinin İğdır şəhərində də keçirilib: “Aprel ayının əvvəllərində isə Türkiyənin Kayseri şəhərində Naxçıvan Muxtar Respublikası Mədəniyyət Nazirliyinin kollektivinin iştirakı ilə muxtar respublikanın 100 illik yubileyi ilə əlaqədar tədbir keçirilib. İl ərzində də muxtar respublikanın yubileyi ilə bağlı bu kimi tədbirlərin keçirilməsi davam etdiriləcək”.
Fuad Nəcəfli: Dövlət Proqramı Naxçıvanın bütün istiqamətlərdə kompleks inkişafını nəzərdə tutur
Çıxışında bu gün Naxçıvanın artıq öz inkişafının yeni mərhələsinə qədəm qoyduğunu qeyd edən Fuad Nəcəfli bildirdi ki, Prezident İlham Əliyevin 5 iyun 2023-cü il tarixli “Naxçıvan Muxtar Respublikasının sosial-iqtisadi inkişafına dair 2023-2027-ci illər üçün Dövlət Proqramı”nın təsdiq edilməsi haqqında Sərəncamı bu mərhələnin əsas hərəkətverici qüvvəsidir: “Dövlət Proqramında nəzərdə tutulmuş tədbirlərin həyata keçirilməsi Naxçıvanı yaxın gələcəkdə tamamilə yenilənmiş, iqtisadi cəhətdən kifayət qədər inkişaf edən, cəlbedici bir regiona çevirəcək. Dövlət Proqramı Naxçıvanın bütün istiqamətlərdə kompleks inkişafını nəzərdə tutur”.
“Bugünkü fotosərgi, həmçinin Naxçıvanın turizm potensialının üzə çıxarılması, daha geniş arenada tanıdılması baxımından da xüsusi əhəmiyyət kəsb edir” deyən səlahiyyətli nümayəndə bu qiyabi tanışlığın hər kəsdə xoş əhvali-ruhiyyə yaradacağına inamını ifadə etdi.
İsa Həbibbəyli: Bu Sərəncam Naxçıvan Muxtar Respublikasına dövlət səviyyəsində göstərilən diqqət və qayğının təzahürüdür
Daha sonra Azərbaycan Milli Elmlər Akademiyasının prezidenti, Milli Məclisin deputatı İsa Həbibbəyli çıxış etdi. Akademik çıxışına “dövlət başçısının Naxçıvan Muxtar Respublikasının yaranmasının 100-cü ildönümü ilə bağlı tarixi Sərəncamı Naxçıvan Muxtar Respublikasına dövlət səviyyəsində göstərilən diqqət və qayğının təzahürüdür” sözləri ilə başladı.
Çıxışında Naxçıvanın taleyində Ulu Öndərin müstəsna roluna diqqət çəkən akademik qeyd etdi ki, bu gün Naxçıvan öz 100 illiyini yeni inkişaf mərhələsi ilə qarşılayır: “Ümummilli Lider Heydər Əliyevin siyasi xəttinin layiqli davamçısı Prezident cənab İlham Əliyev Naxçıvan Muxtar Respublikasının inkişafına hər zaman böyük həssaslıqla yanaşıb, zəngin mədəniyyətə, çoxəsrlik dövlətçilik ənənələrinə malik bu qədim diyarın muxtariyyət tarixinin öyrənilməsinin və təbliğinin zəruriliyini mühüm vəzifə kimi qarşıya qoyub. Bu baxımdan sözügedən Sərəncam Naxçıvanın muxtariyyət tarixinin və inkişaf yolunun müstəqillik ideyaları əsasında Azərbaycançılıq mövqeyindən yenidən öyrənilməsinə mühüm stimul verir”.
Sara Əzimova: “Şərq qapısı” qəzetinin “Naxçıvan fotolarda” sərgisi muxtar respublikanın 100 illik yubileyinə töhfədir
Mərasimdə çıxış edən “Şərq qapısı” qəzetinin baş redaktoru Sara Əzimova bildirdi ki, “Şərq qapısı” qəzetinin “Naxçıvan fotolarda” sərgisi muxtar respublikanın 100 illik yubileyinə töhfədir: “Sərgidə təqdim olunan fotolar “Şərq qapısı” qəzetinin fotoqrafları tərəfindən çəkilib”.
Onu da qeyd edək ki, ümumilkdə 62 fotonun nümayiş olunduğu sərgi böyük maraqla qarşılandı.
Sərgiyə baxəşdan sonra iəs bədii hissə oldu. Tədbirin bədii hissəsinə başlamazdan öncə Ulu Öndər Heydər Əliyevin və ərazi bütövlüyümüz uğrunda şəhid olanların əziz xatirəsi anıldı, Azərbaycan Respublikasının Dövlət Himni səsləndirildi.
Sonra tədbir Beynəlxalq Muğam Mərkəzinin solistləri xanəndə Arzu Əliyeva və Sərxan Bünyadzadənin ifasında konsert proqramı ilə davam etdi.
Sərginin başqa xarici ölkələrdə də keçirilməsi nəzərdə tutulub.
İlk şərhi yaza bilərsiniz