Son yeniləmə: 2 May 2024 18:47
Bakıda Özbəkistanın müasir miniatürçü rəssamlarının əsərlərindən ibarət “Aşiq dərviş” adlı rəsm sərgisi açılıb
BAYRAQDAR MEDİA – Bu bir həqiqətdir ki, hazırda türk dünyası özünün şahlanış dövrünü yaşayır. Bunun da kökündə Türk Dövlətləri Təşkilatının (TDT) daha da güclənməsi dayanır. Təbii ki, TDT də qlobal məkanda söz deməyə iddialı bir təşkilat olaraq öz gücünü xalqların birliyi, bərabərliyi və qədim mədəniyyətindən alır.
TDT daxilində əlaqələr yeni fazaya qədəm qoyub
Qədim mədəniyyətdən söz düşmüşkən, son vaxtlar TDT-yə daxil olan ölkələr arasında mədəniyyət sahəsində əlaqələrin yeni fazaya qədəm qoyduğunu vurğulamaq olar.
Elə mayın 1-də Azərbaycan Milli İncəsənət Muzeyində qardaş Özbəkistanın müasir miniatürçü rəssamlarının əsərlərindən ibarət “Aşiq dərviş” adlı rəsm sərgisinin açılışını da bu istiqamətdə atılan növbəti addım kimi dəyərləndirməliyik.
Özbəkistanla Azərbaycan arasında əməkdaşlıq müsbət dinamikasına və davamlığına görə fərqlənir
Mərasimdə də qeyd edildiyi kimi, bu gün TDT-yə daxil olan ölkələr arasında istər ikitərəfli, istərsə çoxtərəfli əməkdaşlıqlar mövcuddur. O cümlədən Özbəkistanla Azərbaycan arasında bu əməkdaşlıq müsbət dinamikasına və davamlılığına görə fərqlənir.
Mərasimdə çıxış edən Azərbaycan Milli İncəsənət Muzeyinin direktoru Şirin Məlikovanın qeyd etdiyi kimi, bu gün türk dövlətləri arasında birliyin daha da möhkəmlənməsi həm də xalqların birliyindən, mədəniyyətlərin inkişafından aslıdır.
Bu baxımdan Özbəkistanın müasir miniatürçü rəssamlarının əsərlərindən ibarət “Aşiq dərviş” adlı rəsm sərgisi mühüm önəm kəsb edən addımlardan biri kimi dəyərləndirilə bilər.
Miniatür sənəti Doğu mirasıdır
Çıxışında sərgilənən əsərlər barədə da danışan direktor bildirdi ki, miniatür sənəti Doğu mirasıdır və onun bu gün də davam etdirilməsi sevindirici haldır.
Mərasimdə çıxış edən Özbəkistanın Azərbaycandakı səfiri Bahrom Aşrafxanov da bu cür tədbrilərin türk dünyasının daha da dərin inteqrasiyasına təkan verdiyini dedi.
Səfir qeyd etdi ki, əslində bu birlik öz gücünü xalqların mədəni birliyindən alır.
Məqsəd iki qardaş ölkə arasındakı mədəni əməkdaşlığa yeni töhfə verməkdir
Tədbirdə çıxış edən sərginin kuratoru, Özbəkistan Təsviri Sənət Qalereyasının direktoru, sənətşünaslıq üzrə elmlər doktoru, Prof. Kamola Akilova, həmçinin əsərləri nümayiş olunan özbəkistanlı rəssamlar isə miniatür sənətindən söz açaraq, bu mədəni tədbirin əhəmiyyətinə toxundular.
Qeyd edildi ki, sərginin məqsədi qədim miniatür ənənələrini dirçəltməklə bərabər, ona özünəməxsus şəkildə yanaşan özbək rəssamlarının əsərləri ilə Azərbaycan tamaşaçısını yaxından tanış etmək və iki qardaş ölkə arasındakı mədəni əməkdaşlığa yeni töhfə verməkdir.
Natiqlər vurğuladılar ki, orta əsrlərdə intibah dönəmini yaşamış miniatür üslubu müasir dövrdə də özbək milli ənənələrini davam etdirən rəssamların müraciət etdiyi əsas mənbədir. Son otuz ildə bu sənət Özbəkistanda öz tərəqqi dövrünü keçirməkdədir. Firdovsinin “Şahnamə”, Nizaminin “Xəmsə”, Nəvainin “Fərhad və Şirin”, Caminin “Yusif və Züleyxa” poeması və digər ədəbi mənbələr, eləcə də sevgi mövzusu, dərviş obrazları, musiqiçilər, Şərq gözəlləri, səyyah motivləri, tarixi mövzularla işlənmiş süjetlər çağdaş miniatür əsərlərində yeni nəfəs qazanıb.
Sonra miniatür üslubunda hazırlanmış rəsm əsərləri ilə tanışlıq oldu.
80-ə yaxın təsviri və dekorativ-tətbiqi sənət nümunəsi nümayiş etdirilir
Mərasimdə də bildirildiyi kimi, Özbəkistan Təsviri Sənət Qalereyasının təşəbbüsü, Azərbaycan Mədəniyyət Nazirliyi və Milli İncəsənət Muzeyinin birgə təşkilatçılığı ilə reallaşan sərgidə Özbəkistandan olan müxtəlif rəssamların yaradıcılığına aid miniatür üslubunda işlənilmiş 80-ə yaxın təsviri və dekorativ-tətbiqi sənət nümunəsi nümayiş etdirilir.
Sərginin kuratoru Özbəkistan Təsviri Sənət Qalereyasının direktoru, sənətşünaslıq üzrə elmlər doktoru, Prof. Kamola Akilovadır.
Mayın 8-dək davam edəcək sərgi çərçivəsində iştirakçı rəssamlar tərəfindən miniatür sənətinin sirlərini öyrədən “Şərqli dərvişin portreti” adlı ustad dərsi və Prof. Kamola Akilovanın təqdimatında “Özbəkistanın müasir miniatür rəssamlığı: mədəni yaddaş, yoxsa innovasiya?” mövzusunda mühazirə dinləniləcək.
İlk şərhi yaza bilərsiniz