BAYRAQDAR MEDİA – Adana Alparslan Türkeş Elm və Texnologiya Universitetində (ATÜ) Çukurova Universiteti Dövlət Konservatoriyasının töhfələri ilə “ATÜ Yeni il konserti” və kokteyli təşkil olunub. Tədbirdə universitet rəhbərliyi, akademik heyət, tələbələr və dəvətlilər iştirak ediblər.
Bu barədə universitetdən məlumat verilib.
Məlumata görə, konsertdən öncə universitetin Rektorluq fuaye sahəsində kokteyl verilib. Konsert isə ATÜ-nün Konfrans Salonunda keçirilib: “Proqramda Universitetin rektoru Prof. Dr. Adnan Sözen, Prof. Dr. Neşe Yalçın, Prof. Dr. Haşim Kelebek, Prof. Dr. Başak Doğru Mert, Çukurova Universiteti Konservatoriyasının müdiri Prof. Ülviyyə Akbaş, akademik və inzibati heyət üzvləri, eləcə də tələbələr iştirak ediblər. Konsertin açılışında 2025-ci il ərzində universitetdə həyata keçirilən fəaliyyətləri əks etdirən xüsusi videoçarx nümayiş olunub. Həmçinin 2024–2025-ci tədris ilində universitetimizdə əldə olunan uğurları, müsbət yenilikləri və keçirilən tədbirləri bir araya gətirən ATÜ Bülleten Jurnalının təqdimatı keçirilib”.
Məlumata əsasən, proqram çərçivəsində Çukurova Universiteti Dövlət Konservatoriyasının dəyərli akademik heyəti tərəfindən yetişdirilmiş gənc istedadlar və təcrübəli sənətçilər səhnəyə çıxıblar. İfa olunan əsərlər zalda böyük maraqla qarşılanıb, yeni il sevinci musiqinin birləşdirici gücü ilə birlikdə yaşanıb.
