BAYRAQDAR MEDİA – Snuker üzrə Azərbaycan ölkə çempionatı başa çatıb. Bir neçə gün davam edən və gərgin idman mübarizəsi şəraitində keçən yarışda ölkənin güclü snuker ustaları çempionluq uğrunda mübarizə aparıblar.
Bu haqda xəbər BAYRAQDAR MEDİA-ya Azərbaycan Bilyard Federasiyasından (ABF) daxil olub.
Xəbərdə bildirilir ki, “Çempionat ərzində iştirakçılar yüksək texniki hazırlıq, taktiki düşüncə, dəqiqlik və psixoloji dözümlülük nümayiş etdiriblər. Qarşılaşmalar maraqlı və rəqabətli mübarizə ilə yadda qalıb. İdmançılar hər oyunda qələbə əzmi nümayiş etdirərək turnirin yüksək rəqabət səviyyəsinə töhfə veriblər. Yarışın yekun nəticələrinə əsasən mükafatçılar aşağıdakı kimi müəyyənləşib:
I yer – Orxan Qubatov
II yer – Orxan Rzayev
III yer – Vüqar Omarov
III yer – Tural Zeynallı
O.Qubatov çempionatın qalibi adını qazanaraq qızıl medalın sahibi olub. O.Rzayev ikinci, V.Omarov və T.Zeynallı isə üçüncü yeri bölüşüblər“.
Daha sonra xəbərdə, “ABF çempionatda iştirak edən bütün idmançılara təşəkkür edir, qalibləri və mükafatçıları əldə etdikləri nəticələr münasibətilə təbrik edir. Bu cür yarışların keçirilməsi ölkədə snukerin inkişafı, idmançılar arasında rəqabət mühitinin gücləndirilməsi, onların peşəkarlıq səviyyəsinin yüksəldilməsi və yeni istedadların üzə çıxarılması baxımından mühüm əhəmiyyət daşıyır. ABF snuker idman növünün ölkədə daha da geniş yayılması, yerli idmançıların beynəlxalq arenada rəqabət qabiliyyətinin artırılması və bilyard idmanının inkişafı istiqamətində fəaliyyətini davam etdirir” deyə qeyd edilir.
İlk şərhi yaza bilərsiniz