BAYRAQDAR MEDİA – Ardahan Universiteti regional inkişaf və heyvandarlığın inkişafına töhfə verən layihələrə dəstəyini davam etdirir. Bu çərçivədə Eskikılıç, İkizdere və Türkgözü kəndlərinin muxtarlığı və müxtəlif qurumların əməkdaşlığı ilə 1 iyul 2025-ci ildə mühüm layihə müqaviləsi imzalanıb.
Bu barədə universitetdən məlumat verilib.
Məlumata görə, Trans Anadolu Təbii Qaz Boru Kəməri (TANAP) tərəfindən həyata keçirilən Sosial və Ekoloji İnvestisiya Proqramları çərçivəsində “Yerli icmalara dəstək” komponenti daxilində gerçəkləşən bu əməkdaşlıq, TANAP ilə Türkgözü, Eskikılıç və İkizdere kəndləri muxtarlıqları arasında imzalanan müqavilə ilə rəsmiləşib: “Layihədə Ardahan Kənd Təsərrüfatı İdarəsi və Ardahan Universitetini İnkişafetdirmə Fondu iştirakçı tərəf kimi yer alıb. Universitetin Heyvandarlıq İnstitutu çərçivəsində həyata keçirilən bu layihə faydalı heyvandarlığın inkişafı hədəfinə xidmət edir və Universitetin Layihə Ofisinin koordinatorluğu ilə idarə olunur”.
