Son yeniləmə: 6 May 2026
BAYRAQDAR MEDİA– Gələcəyin baytar həkimləri Dokuz Eylül Universitetində keçirilən mərasimdə ağ önlüklərini geyinərək peşə həyatlarına ilk addımlarını atıblar. “Dünya Baytar Həkimləri Günü və 2025-2026-cı tədris ili önlük geyinmə mərasimi” universitetin Baytarlıq fakültəsində təşkil olunub.
Bu barədə universitetdən məlumat verilib.
Məlumata görə, tədbirdə universitetin rektoru Prof. Dr. Bayram Yılmaz, fakültə rəhbərliyi, İzmir Baytar Həkimləri Palatasının nümayəndələri, akademik heyət, tələbələr və onların ailələri iştirak ediblər. Yeni qəbul olunan tələbələr ağ önlüklərini geyinərək peşə həyatına qədəm qoymağın sevincini yaşayıblar.
Rektor Bayram Yılmaz çıxışında baytarlıq peşəsinin yalnız heyvan sağlamlığı ilə məhdudlaşmadığını, eyni zamanda insan və ətraf mühit sağlamlığını da əhatə etdiyini bildirib. O, “Tək Sağlamlıq” yanaşmasının günümüzdə getdikcə daha böyük əhəmiyyət qazandığını vurğulayıb. Fakültə dekanı Prof. Dr. Zafer Bulut isə ağ önlüyün etik dəyərlərin, elmi məsuliyyətin və cəmiyyətə xidmət anlayışının simvolu olduğunu qeyd edib.
Tədbir çərçivəsində universitetin musiqi kollektivinin çıxışı təqdim olunub, həmçinin futbol turnirində çempion olan akademik komandaya kubok verilib. Mərasim xatirə fotolarının çəkilməsi ilə yekunlaşıb.
İlk şərhi yaza bilərsiniz