BAYRAQDAR MEDİA – Samsun vilayətinin Çarşamba rayonunda qadın sahibkar Neşe Özbek fındığa alternativ olaraq əjdaha meyvəsi yetişdirir.
Bu barədə samsungazetesi.com saytı məlumat yayıb.
Bildirilib ki, Samsun İl Kənd Təsərrüfatı və Meşəçilik müdiri Kemal Yılmaz əjdaha meyvəsi istehsal edən Özbek ailəsinin 480 kvadratmetrlik istixanasında olub, istehsal prosesi, məhsuldarlıq və satış imkanları ilə tanış olub.
Neşe Özbek bildirib ki, ailəsi təxminən dörd il əvvəl fındıqdan fərqli məhsul yetişdirmək məqsədilə araşdırma apararkən əjdaha meyvəsini seçib. İstixanada 100 dirəyin ətrafında ümumilikdə 400 ting əkilib. Özbekin sözlərinə görə, son iki ildə həm məhsul, həm də ting satışına başlayıblar. O, əjdaha meyvəsinin fındıqla müqayisədə daha çox gəlir gətirdiyini bildirib.
Hazırda məhsulun bir kiloqramı 250 türk lirəsinə, ədəd olaraq isə 100 lirəyə satılır. Bitkinin öz tingini verməsi səbəbindən şlam üsulu ilə də çoxaldıldığı bildirilir. Ailə həm şəhər daxilində, həm də digər bölgələrə ting göndərir. Bu il bir tingin qiyməti isə 120 lirədir.
Samsun İl Kənd Təsərrüfatı və Meşəçilik müdiri Kemal Yılmaz alternativ məhsul yetişdirilməsi ilə bölgə iqtisadiyyatına töhfə verən istehsalçını təbrik edib.
İlk şərhi yaza bilərsiniz