Son yeniləmə: 22 Oktyabr 2026
BAYRAQDAR MEDİA – Yozqat Bozok Universitetində Türkiyənin sabiq müdafiə naziri, Türkiyə Böyük Millət Məclisinin Milli Müdafiə Komissiyasının sədri və Kayseri millət vəkili Hulusi Akarın iştirakı ilə “Regional və milli təhlükəsizlik” mövzusunda konfrans keçirilib. Tədbirdə Yozqatın valisi Mehmet Ali Özkan, millət vəkilləri, universitet rəhbərliyi, dövlət qurumlarının nümayəndələri, akademiklər və tələbələr iştirak ediblər.
Konfransda çıxış edən universitetin rektoru professor Evren Yaşar təhsil, elmi-tədqiqat, səhiyyə, sənaye ilə əməkdaşlıq və beynəlxalqlaşma sahələrində əldə olunan irəliləyişlərdən danışıb. O, universitetlərin regional inkişaf, texnoloji müstəqillik və ölkənin təhlükəsizliyi baxımından mühüm məsuliyyət daşıdığını bildirib.
Hulusi Akar milli təhlükəsizlik, beynəlxalq münasibətlər, müdafiə sənayesi, elm və texnologiya, “Terrorsuz Türkiyə” prosesi, milli birlik və həmrəylik mövzularında fikirlərini bölüşüb. Gənclərə müraciət edən Akar müstəqil düşünməyin, informasiya çirkliliyinə qarşı diqqətli olmağın və elmi inkişafı izləməyin vacibliyini vurğulayıb.
Türkiyənin beynəlxalq mövqeyindən danışan Akar ölkənin qlobal proseslərdə mühüm rol oynadığını bildirib. Terrorla mübarizənin qətiyyətlə davam etdirildiyini qeyd edən Akar bu prosesdə güzəşt və sövdələşmənin nəzərdə tutulmadığını deyib. O, dövlətin gələcəyi və xalqın rifahı üçün milli birlik və həmrəyliyin, eləcə də təhsilin əhəmiyyətini vurğulayıb.
Konfransdan sonra Hulusi Akarın, millət vəkillərinin və yerli rəsmilərin iştirakı ilə universitetin müasir infrastruktura malik yeni İdman Elmləri fakültəsinin binası istifadəyə verilib.
İlk şərhi yaza bilərsiniz