BAYRAQDAR MEDİA – Yanvarın 7-də bir qrup inquş əsilli şəxs qardaş Türkiyənin İstanbul şəhərində bir araya gələrək İnquş Azadlıq Komitəsi adlı qurumda birləşdiklərini bəyan edib.
Xəbəri Kavkaz.Realii saytı yayıb.
Xəbərdə bildirilir ki, Komitəyə inquş millətindən olan müstəqil ictimai-siyasi fəallar daxildir. Qurumun əsas məqsədi inquş cəmiyyətini azadlıq və müstəqillik ideyaları ətrafında birləşdirməkdir. Son məqsəd isə müstəqil İnquşetiya dövlətinin qurulması üçün əsaslara nail olmaqdır.
Komitə təhlükəsizlik tədbiri kimi hələlik üzvlərinin adını ictimailəşdirməmək qərarına gəlib. Eyni zamanda o da bildirilib ki, digər Qafqaz xalqları ilə də iş birliyi var və mümkündür.
Müzakirələr zamanı iştirakçılar İnquşetiyanın Rusiyanın işğalı altında olmasına diqqət çəkərək müstəqillik üçün dəqiq istiqamətlərlə bağlı fikir mübadiləsi ediblər.
Sonda Komitə üzvü Axmad Ozdo qəbul edilmiş ortaq sənədi səsləndirib.
Sənədə görə, inquşlar Rusiya İmperiyası, SSRİ və Rusiya Federasiyası dövründə etnik ayrıseçkiliyə və istibdada məruz qalıblar. Ona görə də bundan sonra heç bir halda Rusiyanın tərkibində qala bilməzlər.
Sənəddə Ukrayna ilə bağlı prosesə də toxunulub və inquşlar Rusiyanın işğal siyasətində məsuliyyəti bölüşmədiklərini bəyan ediblər.
