BAYRAQDAR MEDİA – Dekabrın 12-14-də türk dünyasının görkəmli yazıçısı Çingiz Aytmatovun 95 illik yubileyi Qırğızıstan Nazirlər Kabinetinin Sərəncamı əsasında Mədəniyyət, İnformasiya, İdman və Gənclər Siyasəti Nazirliyi tərəfindən təşkil olunub.
Bu haqda xəbər BAYRAQDAR MEDİA-ya Türk Mədəniyyəti və İrsi Fondundan daxil olub.
Xəbərdə qeyd edilir ki, “Bişkekdə keçirilən tədbirdə Fondu təşkilatın Qırğızıstan üzrə nümayəndəsi Nazgül Omurzakova və Fərid Hüseyn təmsil edib. Bişkekdəki Tarix Muzeyində keçirilən “Biz eyni gəmidəyik” adlı plenar iclasda N.Omurzakova Fondun prezidenti Aktotı Raimkulovanın təbrik məktubunu oxuyub. Məktubda Fondun prezidenti beynəlxalq təşkilatın Qırğızıstan mədəniyyəti, ədəbiyyatı və elmi irsinin dünyada tanıdılması istiqamətində həyata keçirdiyi müxtəlif layihələrdən söz açaraq görkəmli yazıçı Ç.Aytmatovun irsinin təbliği yönündə təşkilatın gördüyü işlərdən, həmçinin ədibin türk mədəniyyəti və ədəbiyyatı tarixindəki müstəsna xidmətlərindən bəhs olunub”.
Sonra xəbərdə, “həmçinin Fondun təqdimatı ilə tədbirdə Azərbaycanın Əməkdar artisti, Bakı Bələdiyyə Teatrının aktrisası Hüsniyyə Mürvətova da iştirak edib. H.Mürvətova çıxışında Fondun sifarişi ilə Bakı Bələdiyyə Teatrı tərəfindən səhnələşdirilən Ç.Aytmatovun “Ana tarla” əsərinin tamaşaya qoyulmasından, Azərbaycan tamaşaçıları tərəfindən səhnə əsərinə olan yüksək maraqdan danışıb. O, həmin tamaşada canlandırdığı Tolqanay ana obrazının bir aktrisa kimi onun sənət həyatında əhəmiyyətli rol oynadığından bəhs edib və sonda tamaşanın epiloqunu canlandırıb” deyə bildirilir.
Daha sonra tədbirin II müzakirə panelində Fondun əməkdaşı F.Hüseyn “Hər yeni əsrlə bərabər yeni mahiyyət qazanan Çingiz Aytmatov ideyaları” adlı məruzə ilə çıxış edərək görkəmli ədibin XXI əsrin çağırışları ilə səsləşən ədəbi düşüncələrindən söz açıb, habelə ədibin aktual yaradıcılığının Fondun dəstəyi ilə tərcüməsi, çapı, o cümlədən təşkilatın sifarişi ilə Azərbaycan teatrlarının səhnələşdirdiyi tamaşalarının yeni səhnə həyatı qazanmasının önəmindən söz açıb.
