BAYRAQDAR MEDİA – Eskişehir Böyükşəhər Bələdiyyəsinin sədri Ayşe Ünlüce Osmanlı tarixinin mühüm məkanlarından biri olan Karacahisar qalasında davam edən arxeoloji qazıntı işləri ilə tanış olub.
Bu barədə sakaryagazetesi.com.tr saytı məlumat verib.
Bildirilib ki, Odunpazarı rayonunun Karacaşehir məhəlləsində yerləşən qazıntı sahəsinə baş çəkən Ayşe Ünlüce qazıntı rəhbəri dosent Dr. Hasan Yılmazyaşardan aparılan işlər, aşkar edilən tarixi qalıqlar və ərazinin mədəni turizmə qazandırılması ilə bağlı layihələr barədə məlumat alıb.
Mədəniyyət və Turizm Nazirliyi ilə Anadolu Universitetinin əməkdaşlığı, Eskişehir Valiliyinin dəstəyi ilə aparılan qazıntılar Osmanlı dövlətinin yaranma dövrünə dair mühüm izlərin üzə çıxarılmasına xidmət edir. İşlər professor Halil İnalcıkın təşəbbüsü ilə başlayıb və hazırda dosent Dr. Hasan Yılmazyaşarın rəhbərliyi ilə davam etdirilir.
Ayşe Ünlüce Eskişehirin tarixi və mədəni dəyərlərinin qorunması ilə yanaşı, onların turizm potensialına çevrilməsinin də mühüm olduğunu bildirib. O, Karacahisar qalasındakı qazıntı işlərini yaxından izlədiklərini qeyd edib.
Qazıntılar nəticəsində ərazinin tarixi kimliyinin daha əhatəli şəkildə ortaya çıxarılması və Eskişehirin mədəni turizminə töhfə verilməsi hədəflənir.
İlk şərhi yaza bilərsiniz