Bayraqdar.info – Milli QHT Forumunun X Qurultayı ilə əlaqədar namizədliklərin irəli sürülməsi kampaniyasının müddəti uzadılıb.
Bu barədə bayraqdar.info-ya sentyabrın 9-da MQF-dən məlumat verilib.
Bildirilib ki, MQF İdarə Heyətinin qərarı ilə namizədliklərin irəli sürülməsinin müddəti 30 sentyabr 2021-ci il tarixinədək uzadılıb.
“MQF-nin X Qurultayı hesabat-seçki qurultayı olduğuna görə qurumun rəhbər orqanlarına (Prezident, İdarə Heyəti, Nəzarət-Təftiş Komissiyası) seçkilər keçiriləcək. MQF-nin Nizamnamə tələblərinə uyğun olaraq hər bir MQF üzvü olan QHT rəhbəri və nümayəndəsi MQF-nin rəhbər orqanlarına namizədliklərini irəli sürə bilər. MQF üzvü olan QHT rəhbərlərinin bu prosesdə aktiv iştirak etmələri xahiş olunur”, – deyə məlumatda qeyd edilib.
Vurğulanıb ki, namizədliyi irəli sürmək üçün tələblər aşağıdakı kimidir:
MQF üzvü olan QHT rəhbərləri və nümayəndələri namizədliyini irəli sürə bilər;
Namizədliyini irəli sürən şəxsin rəhbərlik etdiyi QHT-nin İdarə Heyətinin qərarı olmalıdır.
Namizədliyin irəli sürülməsi üçün lazım olan sənədlərin (ərizə, anket və tərcümeyi-hal) qəbulu üçün son tarix 30 sentyabr 2021-ci ildir. Müraciət üçün sənədlər azngoforum@gmail.com e-poçt ünvanına göndərilməlidir.
O da qeyd edilib ki, MQF-nin Nizamnamə tələblərinə cavab verməyən QHT nümayəndəsinin namizədliyi qəbul edilməyəcək.
