BAYRAQDAR MEDİA – Elm və Ali Təhsil üzrə Dövlət Agentliyinin (EATDA) müvafiq əmrinə əsasən Səbinə Mehdiyeva Azərbaycan Milli Konservatoriyasının nəzdində Bakı Musiqi Kollecinin direktoru vəzifəsinə təyin edilib.
Bu haqda xəbər BAYRAQDAR MEDİA-ya EATDA-nın mətbuat xidmətindən daxil olub.
Xəbərdə qeyd edilir ki, “S.Mehdiyeva Bakı Musiqi Akademiyasında fortepiano ixtisası üzrə bakalavriat, musiqişünaslıq ixtisası üzrə magistratura təhsili alıb. O, 2009-cu ildə sənətşünaslıq üzrə fəlsəfə doktoru elmi dərəcəsini əldə edib. Pedaqoji fəaliyyətinə 2001-ci ildə Azərbaycan Dövlət Mədəniyyət və İncəsənət Universitetində müəllim kimi başlayan S.Mehdiyeva sonrakı illərdə həmin ali təhsil müəssisəsində baş müəllim, dosent və kafedra müdiri vəzifələrində çalışıb. O həmçinin Bakı Musiqi Akademiyasında fortepiano müəllimi kimi fəaliyyət göstərib”.
Daha sonra xəbərdə, “2021-ci ildən hazırkı təyinatınadək Azərbaycan Milli Konservatoriyasının nəzdində Sumqayıt Musiqi Kollecinin direktoru vəzifəsində çalışıb. S.Mehdiyeva respublika və beynəlxalq müsabiqələrin laureatıdır. O, eyni zamanda bir sıra elmi məqalələrin və dərs vəsaitlərinin həmmüəllifidir” deyə bildirilir.
İlk şərhi yaza bilərsiniz