Vüsalə Məmmədzadə: İnsan kapitalı və yeni Mədəniyyət Konsepsiyası üçün bir olaq
BAYRAQDAR MEDİA – “Hörmətli həmkarlar, dəyərli kulturoloqlar! Bu gün ölkəmizin mədəni inkişafında yeni və həlledici bir mərhələ başlayıb. Azərbaycan Respublikasının Prezidenti İlham Əliyevin 14 yanvar tarixində imzaladığı Sərəncamla təsdiq edilən “Azərbaycan Mədəniyyəti – 2040” Azərbaycan Respublikasının Mədəniyyət Konsepsiyası qarşımızda böyük imkanlar və eyni zamanda ciddi məsuliyyət qoyur. Lakin təəssüflə qeyd etməliyəm ki, bu prosesdə iştirak edənlərin bir çoxu hələ də köhnə təfəkkürlə — mədəniyyəti yalnız ədəbiyyat və incəsənət çərçivəsində görən dar bir baxış bucağı ilə yanaşırlar”.
Bunu kulturoloq, Azərbaycan kulturoloqlar cəmiyyətinin və”Simurq” Azərbaycan Mədəniyyət Assosiasiyasının üzvü Vüsalə Məmmədzadə deyib.
Kulturoloqlara müraciətində F.Məmmədzadə bildirib ki, Kulturologiya — 21-ci əsrin əsas elmi paradiqmasıdır: “Müasir dünyada kulturologiya sadəcə bir fənn deyil, sosial və humanitar sahələrin əsas paradiqmasıdır. Təəssüf ki, bəzi səriştəsiz və təsadüfi adamlar “mədəniyyət” fənnini tarixlə incəsənətin sadə bir birliyi kimi təqdim edərək ictimaiyyəti yanlış məlumatlandırırlar. Kulturologiyanın elmi mahiyyətini dərk etmədən atılan bu addımlar cəmiyyətimizin mədəni inkişafını yanlış istiqamətə yönəldə bilər. Bizim beynəlxalq səviyyədə tanınan elmi nailiyyətlərimiz var və bu potensialdan dövlətimizin qüdrətini artırmaq, xalqımızın mənəvi ucalığını təmin etmək üçün istifadə etməliyik”.
V.Məmmədzadə əlavə edib ki, əsas hədəf yüksək mədəniyyətli Azərbaycan vətəndaşıdır: “Cənab Prezidentin də dəfələrlə vurğuladığı kimi, 21-ci əsrin ən vacib hədəfi insan kapitalının inkişafıdır. Bu kapitalın nüvəsini isə məhz yüksək mədəniyyətli Azərbaycan vətəndaşı təşkil edir. Enerji resurslarının keçici olduğunu nəzərə alsaq, neft-qaz gəlirlərinin insan kapitalına yönəldilməsi dövlətimizin strateji xəttidir. Biz kulturoloqların üzərinə düşən əsas vəzifə bu “yenidən hasil olunan resursun”- təhlükəsiz, rəqabətqabiliyyətli və davamlı inkişafı təmin edəcək şəxsiyyətin formalaşdırılmasına elmi dəstək verməkdir”.
Elə buna görə də “Gəlin bir nöqtəyə vuraq” deyən V.Məmmədzadə daha sonra bunları qeyd edib: “Dövlət başçımızın yüksək intellektual mədəniyyəti, qətiyyətli diplomatiyası və vətənpərvərliyi hər birimiz üçün nümunədir. Bu yolda ona kömək etmək, cəmiyyətimizi mədəni deqradasiyadan qorumaq və elmi əsaslara söykənən inkişafı təmin etmək bizim mənəvi borcumuzdur. Sizi daha fəal olmağa, qüvvələrimizi bir nöqtəyə vurmağa çağırıram. Mədəniyyət sadəcə keçmişin mirası deyil, gələcəyin qurulma strategiyasıdır. Hamınıza bu şərəfli yolda uğurlar arzulayıram”
