BAYRAQDAR MEDİA – Türkiyənin Atatürk Universitetinin Açıq və Distant Təhsil Fakültəsi tərəfindən Bakıda məzuniyyət mərasimi keçirilib. Atatürk Universitetinin rektoru Prof. Dr. Ahmet Hacımüftüoğlunun iştirakı ilə keçirilən mərasimdə 2026-2027-ci tədris ilində məzun olan təxminən 200 tələbə məzuniyyət sevincini yaşayıb.
Bu barədə universitetdən məlumat verilib.
Bildirilib ki, Türkiyə ilə Azərbaycan arasındakı möhkəm qardaşlıq və dostluq əlaqələrinin vurğulandığı mərasimdə rektor Hacımüftüoğlu ilə yanaşı, onun həyat yoldaşı Prof. Dr. Esra Hacımüftüoğlu, Türkiyənin Bakıdakı səfirliyinin təhsil müşaviri Yurdagül Aydoğan, TİKA-nın Azərbaycan koordinatoru Mahmut Ağırman, Azərbaycan Yunus Emre İnstitutunun koordinatoru Gökhan Seyhan, Atatürk Universitetinin rektor müavini Prof. Dr. Reyhan Keleş, Azərbaycan Dövlət Pedaqoji Universitetinin rektor müavini Könül Pirişvərdiyeva, Bakıdakı KKTC Təhsil Attaşesi Leyla Güneş, EkoAvrasiya Fondunun Müvəkkillər Heyətinin sədri Hikmet Eren, Türkiyə Maarif Fondunun Azərbaycan üzrə nümayəndəsi Tabip Gülbay, Türkiyə Diyanət Vəqfinin Bakı Türk Liseyinin direktoru Kadir Bektaşoğlu, TÜRKPA nümayəndəsi Kadir Yaman, eləcə də akademiklər, tələbələr və onların ailə üzvləri iştirak ediblər.
Prof. Dr. Ahmet Hacımüftüoğlu: Atatürk Universiteti məsafələri aradan qaldırır
Proqram Türkiyə və Azərbaycanın dövlət himnlərinin səsləndirilməsi ilə başlayıb. Daha sonra Atatürk Universiteti və Açıq və Distant Təhsil Fakültəsinin tanıtım filmləri nümayiş etdirilib. Proqramda çıxış edən Atatürk Universitetinin rektoru Prof. Dr. Ahmet Hacımüftüoğlu məzun tələbələri təbrik edərək, onların təhsil həyatında əldə etdikləri uğurların əhəmiyyətinə diqqət çəkib.
Rektor Hacımüftüoğlu çıxışında Türkiyə ilə Azərbaycan arasındakı tarixi və qardaşlıq əlaqələrinə diqqət çəkərək, Bakıda keçirilən məzuniyyət mərasiminin iki qardaş xalq arasında mövcud olan könül körpüsünün təhsil və elm sahəsindəki güclü əks-sədası olduğunu bildirib. Prof. Dr. Hacımüftüoğlu Atatürk Universitetinin biliyi geniş kütlələrə çatdırmaq missiyasına diqqət çəkərək, Açıq və Distant Təhsil Fakültəsinin ölkə daxilində və xaricində geniş təhsil şəbəkəsi ilə məsafələri aradan qaldırdığını qeyd edib. O, Bakıda keçirilən məzuniyyət mərasiminin də bu yanaşmanın mənalı göstəricisi olduğunu söyləyib. Türkiyə-Azərbaycan münasibətlərinin tarixi dərinliyinə də toxunan Hacımüftüoğlu iki ölkə arasındakı həmrəyliyin keçmişdən bu günə təhsil, elm və ortaq dəyərlər üzərindən gələcəyə daşındığını vurğulayıb.
Məzunlara müraciət edən rektor diplomun yalnız təhsil prosesinin başa çatdığını göstərən sənəd olmadığını bildirib. O, bu uğurun zəhmət, səbir, əzm və ailələrin fədakarlığı hesabına əldə edildiyini vurğulayıb. Məzunların bundan sonrakı həyatlarında Türkiyə-Azərbaycan dostluğunun könüllü təmsilçiləri olacaqlarını bildirən Hacımüftüoğlu, Atatürk Universitetinin Ərzurumdan Bakıya uzanan təhsil və könül körpüsünün yeni məzunlarla daha da möhkəmlənəcəyini deyib. Çıxışının sonunda məzunları və onların ailələrini təbrik edən rektor Türkiyə ilə Azərbaycan arasındakı qardaşlığın elm, təhsil və ortaq gələcək hədəfləri istiqamətində daha da güclənməsini arzulayıb.
Rektor Hacımüftüoğlunun məzunlara müraciətindən sonra Azərbaycan xalq rəqslərindən ibarət kompozisiya təqdim olunub və musiqi proqramı keçirilib. Azərbaycanın zəngin mədəni irsindən nümunələrin nümayiş etdirildiyi çıxışlar dəvətlilər tərəfindən maraqla izlənilib.
Uğurlu tələbələr mükafatlandırılıb
Proqram çərçivəsində təhsil həyatında göstərdikləri uğurlarla fərqlənən tələbələrə hədiyyə və plaketlər təqdim olunub. Uğurlu tələbələrin mükafatları Atatürk Universitetinin rektoru Prof. Dr. Ahmet Hacımüftüoğlu tərəfindən təqdim edilib.
Mərasimin davamında 2026-2027-ci tədris ilində məzun olan təxminən 200 tələbənin adı bir-bir səsləndirilərək səhnəyə dəvət olunub. Tələbələr simvolik məzuniyyət sənədlərini rektor Hacımüftüoğlunun əlindən alaraq məzuniyyət sevincini ailələri və dəvətlilərlə bölüşüblər.
Məzuniyyət coşqusu kep atma mərasimi ilə zirvəyə çatıb
Proqramın ən coşqulu anlarından biri də təxminən 200 məzunun iştirak etdiyi kep atma mərasimi olub. Geri sayımdan sonra kepələrini havaya atan məzunlar məzuniyyətlərini böyük coşqu ilə qeyd ediblər. Kep atma mərasimindən sonra protokol üzvləri, akademiklər, məzunlar və onların ailələrinin iştirakı ilə xatirə fotosu çəkdirilib. Atatürk Universitetinin Açıq və Distant Təhsil Fakültəsi tərəfindən Bakıda təşkil olunan məzuniyyət mərasimi məzuniyyət kokteyli ilə başa çatıb.
İlk şərhi yaza bilərsiniz