Bayraqdar.info – Türkiyə Cümhurbaşqanı Recep Tayyip Erdoğan mayın 5-də Rusiya Prezidenti Vladimir Putinlə telefonla danışıb.
Bu haqda xəbəri Türkiyə Cümhurbaşqanı özünün Telegram hesabında paylaşıb.
R.T.Erdoğan yazıb ki, telefon görüşməsində iki ölkə arasında ilişkiləri inkişaf etdirəcək addımlar, COVID-19-la mücadilədə işbirliyi və bölgəyə aid məsələlər müzakirə edilib.
“Əldə edilən razılaşma çərçivəsində Rusiyadan Türkiyəyə göndəriləcək “Sputnik V” peyvəndinin göndərişinin planlanan şəkildə gerçəkləşməsini gözlədiyimizi Sayın Putinə bildirdim”, – deyə R.T.Erdoğan bildirib.
Türkiyə Cümhurbaşqanı eyni zamanda iki ölkə arasındakı işbirliyinə COVID-19 peyvəndinin istehsalının da əlavə edilməsindən məmnunluğunu bildirib.
“Suriyada qalıcı sabitliyin təmin edilməsində Türkiyə-Rusiya işbirliyinin önəminə işarət edərək Dağlıq Qarabağ mövzusunda da bölgəsəl normallaşma və sabitlik sürəcindən yaxşı istifadə edilməsinin gərəkliliyini dilə gətirdim”, – deyə R.T.Erdoğan qeyd edib.
Rusiya Prezidentinin Administrasiyası da telefon söhbəti haqqında xəbər yayıb. Burada tərəflərin həm də Liviya ilə bağlı fikir mübadiləsi apardığı qeyd edilib.
