Oljas Süleymenovtıñ 90 jıldığına

Son yeniləmə: 17 May 2026

Oljas Süleymenovtıñ 90 jıldığına oray Almatıda VII Euraziya mädeniyetterin jaqındastıru forumı ötedi

BAYRAQDAR MEDİA – 2026 jılğı 26 mamırda Almatı qalasında körnekti qazaqstandıq aqın, qoğam qayratkeri äri oyşıl Oljas Süleymenovtıñ 90 jıldığına arnalğan “Öz jeriniñ elşisi” attı Euraziya mädeniyetterin jaqındastıru jönindegi VII xalıqaralıq forumı ötedi.

Biyıl Qazaqstan men älemniñ birqatar elderi añızğa aynalğan aqın, oyşıl, lingvist-ğalım, “Nevada – Semey” xalıqaralıq antiyadrolıq qozğalısınıñ negizin qalauşı Oljas Süleymenovtıñ 90 jıldıq mereytoyın atap ötude. 1960 jıldardan bastau alğan Oljas Omarulınıñ şığarmaşılıq jäne ziyatkerlik qızmeti türki xalıqtarınıñ älemdik örkeniyettegi tarixi ornın jañaşa payımdauğa zor ıqpal etip, Euraziya xalıqtarınıñ ortaq murasına degen qızığuşılıq pen mädeni sana-sezimniñ artuına jol aştı.

1989 jılı onıñ bastamasımen qurılğan “Nevada – Semey” xalıqaralıq antiyadrolıq qozğalısı XX ğasır soñındağı eñ iri qoğamdıq qozğalıstardıñ birine aynalıp, Semey yadrolıq poligonınıñ jabıluvına ıqpal etti. Sonıñ nätijesinde Qazaqstan jahandıq antiyadrolıq qozğalstıñ bastı simboldarınıñ birine aynaldı. Al Oljas Süleymenov negizin qalağan sanalı özara täueldilik filosofïyası XXI ğasırdağı mädeniyetterdi jaqındastıru men älemdi jañğırtuğa bağıttalğan irgeli ideyalardıñ qatarına endi.

Aldağı forumnıñ maqsatı – Oljas Omarulınıñ ïdeyalıq, ädebi, ğılımi jäne filosofïyalıq murasın zerdeläp, onı ulttıq äri jahandıq deñgeydegi zamanaui mädeni jäne bilim berü üderisine engizudiñ praktïkalıq tetikterin qarastıru.

Oljas Süleymenovtıñ 90 jıldığına arnalğan forum 26 mamır küni Almatıdağı “Qazaqstan” qonaqüyinde ötedi. Auqımdı jiyınğa Qazaqstan, Fransiya, Resey, Äzerbayjan, Türkiye, Qırğızstan, Täjikstan, Özbekstan, Qıtay, AQŞ jäne özge de elderden mädeniyet, ğılım, ädebiyet salasınıñ tanımal ökilderi, xalıqaralıq uyımdar men qoğamdıq instituttardıñ müşeleri qatısadı.

İs-şaranı Bolat Ötemuratov Qorı, Qazaqstan Respublikasınıñ Mädeniyet jäne aqparat ministrligi janındağı UNESCO qamqorlığındağı Mädeniyetterdi jaqındastıru xalıqaralıq ortalığı jäne forum seriktesteri uyımdastıradı.

Bolat Ötemuratov Qorı birneşe jıldan beri Oljas Süleymenov murasın däripteuge arnalğan mädeni jäne gumanitarlıq jobalardı turaqtı türde qoldap keledi. Qordıñ qoldauımen “Öz jeriniñ elşisi” kitabı üş tilde qayta basılıp, “Az i Ya” eñbegi jarıqqa şıqqanına 50 jıl toluına oray jaña basılımmen oqırmanğa jol tarttı. Sonımen qatar avtordıñ 90 jıldığına arnalğan “Poemalar kitabı” jarıq kördi. Forum ayasındağı mañızdı oqiğalardıñ biri – Bolat Ötemuratov Qorınıñ qoldauımen Oljas Süleymenovtıñ mereytoyına oray äzirlengen jaña basılımdardıñ tanıstırılımı.

Forum mädeniyetterdi jaqındastıruğa jäne xalıqtar arasındağı sanalı özara täueldilik qağidatın nığaytuğa arnalğan xalıqaralıq dialog alañına aynaladı.

Anıqtama: Bolat Ötemuratov Qorı 2014 jılı belgili qazaqstandıq käsipker äri mesenat Bolat Ötemuratovtıñ bastamasımen qurılğan. Qor Qazaqstandağı qayırımdılıqtıñ jüyeli ülgileriniñ birin qalıptastırıp, bilim berü, densaulıq saqtau, mädeniyet, ekologiya, inklyuziya, tabiği apatlardan zardap şekkenderge kömek körsetü, sonday-aq zamanaui äleümettik infraqurılım qalıptastıru arqılı öñirlerdi damıtu bağıttarındağı jobalarğa 240 mln AQŞ dollarınan astam qarajat böldi.