BAYRAQDAR MEDİA – Heydər Əliyev Azərbaycanın dövlətçilik tarixində misilsiz xidmətləri ilə yadda qalan, ölkənin inkişaf strategiyasını müəyyənləşdirən ümummilli liderdir. O, təhsili dövlətin və xalqın gələcəyini müəyyən edən ən əsas sahələrdən biri kimi dəyərləndirirdi. Heydər Əliyevin siyasi fəaliyyətində təhsil yalnız sosial sfera deyil, həm də cəmiyyətin intellektual potensialını formalaşdıran, ölkənin inkişaf yolunu müəyyən edən strateji amil idi. Onun rəhbərliyi dövründə təhsil sistemində aparılan islahatlar ardıcıllığı, geniş miqyası və davamlılığı ilə diqqət çəkirdi. Ulu öndər hər zaman bildirirdi ki, bir xalqın gələcək inkişafı onun təhsilinin səviyyəsindən asılıdır və bu prinsipi siyasətinin əsas xəttinə çevirirdi.
Heydər Əliyevin təhsilə göstərdiyi qayğı ən çox infrastrukturun yenilənməsi və müasirləşmə ilə özünü göstərirdi. Onun təşəbbüsü ilə respublikanın müxtəlif bölgələrində onlarla məktəb yenidən quruldu, yüzlərlə yeni təhsil müəssisəsi inşa edildi. Bu proses həm şəhər, həm də rayon və kənd məktəblərini əhatə edir, təhsilin əlçatanlığı və keyfiyyətinin yüksəldilməsi üçün mühüm addımlar atılırdı. Təhsil müəssisələrinin maddi-texniki bazasının möhkəmləndirilməsi, laboratoriyaların, kitabxanaların, idman zallarının yaradılması Heydər Əliyevin təhsilə baxışının ayrılmaz hissəsi idi. O, təhsilin yalnız bilik vermək deyil, şəxsiyyət yetişdirmək missiyasını daşıdığını vurğulayırdı.
Ümummilli lider müəllimlərin əməyini yüksək qiymətləndirir və bu peşəyə xüsusi hörmətlə yanaşırdı. Onun siyasi kursunda müəllim nüfuzunun artırılması, onların sosial rifahının yaxşılaşdırılması xüsusi yer tuturdu. Müəllimlərin maaşlarının mərhələli şəkildə artırılması, qabaqcıl pedaqoqların dövlət səviyyəsində təltif olunması və təhsildə çalışan mütəxəssislərə xüsusi qayğının göstərilməsi bu sahənin inkişafına böyük təkan verdi. Heydər Əliyev müəllimləri cəmiyyətin intellektual dayağı hesab edir, onların yetişdirdiyi gənclərin ölkənin sabahının təminatçısı olduğunu bildirirdi.
Ali təhsilin inkişafı və beynəlxalq əlaqələrin genişləndirilməsi də Heydər Əliyevin təhsil siyasətinin mühüm istiqamətlərindən biri idi. Onun dövründə Azərbaycan universitetlərinin dünya elmi ilə inteqrasiyası gücləndi, gənclərin xarici ölkələrdə təhsil alması üçün geniş imkanlar yaradıldı. Ali məktəblərdə kadr hazırlığının müasir standartlara uyğunlaşdırılması, elm və təhsil müəssisələrinin qarşılıqlı əməkdaşlığı ölkənin elmi potensialını artırdı. Heydər Əliyev gəncləri Azərbaycanın gələcəyi kimi dəyərləndirir, onların bilikli, savadlı və dünyagörüşlü yetişməsini əsas vəzifə hesab edirdi.
Heydər Əliyevin təhsil fəlsəfəsinin təməlində milli-mənəvi dəyərlərlə müasir yanaşmanın vəhdəti dayanırdı. O, gənclərin həm milli köklərə bağlı, həm də dünya elminə açıq olmasını vacib hesab edir, təhsilin cəmiyyətin mənəvi inkişafında aparıcı rol oynadığını vurğulayırdı. Onun yaratdığı təhsil modeli bu gün də Azərbaycanın intellektual inkişafının əsasını təşkil edir. Müstəqilliyin ilk illərində ölkənin qarşılaşdığı çətinliklərə baxmayaraq, Heydər Əliyevin uzaqgörən siyasəti nəticəsində təhsil sahəsi dirçəlişə qədəm qoydu və inkişafın yeni mərhələsinə çatdı. Bu gün ölkənin təhsil sisteminin uğurları, müasir məktəblər şəbəkəsi, ali təhsilin beynəlxalq mövqeyi və innovativ düşüncəli gənclər nəslinin formalaşması onun qoyduğu təməl üzərində inkişaf edir.
Azərbaycan xalqı hər il 12 dekabr tarixində ümummilli lider Heydər Əliyevin əziz xatirəsini böyük ehtiramla yad edir. Onun təhsilə göstərdiyi qayğı, gələcək nəsillər üçün yaratdığı geniş imkanlar, milli inkişafın əsas istiqamətlərini müəyyən edən uzaqgörən siyasəti bu gün də yaşayır. Heydər Əliyevin təhsil sahəsində qoyduğu zəngin irs gələcək nəsillərə yol göstərən bir məktəb olaraq qalır və Azərbaycan təhsilinin davamlı inkişafına xidmət edir.
Pənah Ələsgərov,
M.Osmanov adına Mehrəliqışlaq kənd orta məktəbinin direktoru. Xaçmaz rayonu
